ءۇندىستاندا جاۋىن-شاشىن ماۋسىمى باستالىپ، جاعدايدى ودان سايىن قيىنداتىپ جىبەردى. كوروناۆيرۋستان قايتىس بولعان ادامداردىڭ مۇردەلەرىن سۋ شايىپ، ولار گانگ وزەنىندە اعىپ ءجۇر. حابارلارعا قاراعاندا، بۇل ادامدار بيىل كوكتەمدە كوروناۆيرۋستان قايتقان. سول كەزدە ۇندىستەردىڭ كوبى اۋرۋدان قايتىس بولعان تۋىستارىنىڭ دەنەسىن ورتەي الماي، كەدەيلەر مۇردەلەردى سۋعا اعىزعان، نەمەسە قۇمدى جەرگە كومگەن.
جەرگىلىكتى تۇرعىن رادجۋ چاندالدىڭ ايتۋىنشا، "گانگ وزەنىنىڭ دەڭگەيى كوتەرىلگەن ۋاقىتتا، ونىڭ جاعالاۋىندا تەرەڭ ەمەس كورگە جەرلەنگەندەردىڭ مۇردەلەرى سۋ بەتىنە قالقىپ شىعىپ جاتىر. مۇردە قالدىقتارىن قارعالار مەن قاڭعىباس يتتەر جەيدى".
ءۇندىستانداعى اللاحاباد قالاسى بيلىگىنىڭ مالىمدەۋىنشە، ماۋسىم ايىندا گانگ وزەنىنە قالقىپ شىققان 150 مۇردە ورتەلگەن.
ۇندىستەر ءداستۇر بويىنشا مۇردەنى ورتەپ، ونىڭ كۇلىن سۋعا تاستايدى. مۇنداي عۇرىپ 100 دوللار تۇرادى. ءۇندىستانداعى كەدەيلەردە مۇنداي اقشا جوق. سول سەبەپتى ولار قايتىس بولعان تۋىستارىن قاسيەتتى سانالاتىن گانگ وزەنىنىڭ جاعالاۋىنا جەرلەيدى.
ءۇندىستاندا 1،3 ميلليارد ادام تۇرادى. ول كوروناۆيرۋستان ەڭ قاتتى زارداپ شەككەن مەملەكەت.
https://youtu.be/yQGPE0OSI6E
