ۇلتتىق سپورت قاۋىمداستىعىنىڭ پرەزيدەنتى رەتىندە، 2022 جىلدىڭ قىركۇيەگىنەن باستاپ بەلگىلى كاسىپكەر، مەسەنات يسلامبەك سالجانوۆ سايلاندى. بۇل قىزمەتكە كىرىسكەن سوڭ يسلامبەك تولەۋباي ۇلى قاۋىمداستىق قۇرامىنداعى فەدەراسيالارعا ءوزى جاقسى تانيتىن، ەلگە جانى اشيتىن كاسىپكەر ازاماتتار مەن قوعام قايراتكەرلەرىن ۇلتتىق سپورتتى بىرلەسە دامىتۋعا شاقىردى.
وزدەرىڭىزگە ءمالىم، سوڭعى جىلدارى مەملەكەت باسشىسى قاسىم-جومارت كەمەل ۇلى توقايەۆتىڭ تىكەلەي قولداۋىمەن ەلىمىزدە ۇلتتىق سپورت تۇرلەرى قارقىندى دامىپ كەلەدى. جىل باسىندا پرەزيدەنت ۇلتتىق سپورت تۇرلەرىنىڭ دامۋ كونسەپسياسىن ازىرلەۋدى تاپسىرعان ەدى. ءقازىر بۇل باعىت بويىنشا قىزۋ جۇمىستار ءجۇرىپ جاتىر.
بىلتىر ۇلتتىق سپورت قاۋىمداستىعىنا 6 فەدەراسيا عانا كىرگەن، ءبىر جىل ىشىندە فەدەراسيالار سانى 10-عا دەيىن ارتتى.
بۇرىن قاۋىمداستىق جۇمىسى ءبىر ورتالىق جۇيەسى ارقىلى باسقارىلاتىن. ال ءقازىر، كەرىسىنشە فەدەراسيالارعا اۆتونوميا بەرۋ ستراتەگياسى قولدانىسقا ەنىپ وتىر. سونىڭ ناتيجەسىندە، بيىل ۇلتتىق سپورت سالاسىن ءبىرقاتار وڭ وزگەرىستەرگە قول جەتكىزدى.
وسى ءبىر جىلدىڭ ىشىندە سپورتشىلارىمىز كوپتەگەن حالىقارالىق جارىستارعا قاتىسىپ، 96 مەدال جەڭىپ الدى. ونىڭ 35ء-ى التىن. رەسپۋبليكالىق جارىستار دا جوعارى دەڭگەيدە ءوتتى.
كاسىبي، بىلىكتى مامانداردى دايىنداۋ ماقساتىندا ۇلتتىق سپورت تۇرلەرى بويىنشا مامانداردى دايىنداۋ باعدارلامالارى ازىرلەندى. بۇگىندە ەكى بىردەي جوعارعى وقۋ ورنىندا ەكى ماماندىق ءتۇرى بويىنشا وقۋ باعدارلاماسى ەنگىزىلدى. سونداي-اق ۇلتتىق سپورتتىڭ جوعارى مەكتەبىن اشۋ جۇمىسى قولعا الىندى.
ۇلتتىق سپورت قاۋىمداستىعىنىڭ تاعى دا ءبىر ماڭىزدى باعىتى – قوستاناي جىلقىسىنىڭ سانىن ساقتاپ قالۋ جانە ونىڭ ءارى قاراي دامۋى. بارشاڭىز بىلەسىزدەر، قوستاناي جىلقىسى – ەلىمىزدەگى جالعىز اسىل تۇقىمدى قازاق جىلقىسى.
وسى ماقساتتا ءبىز، ۇلتتىق سپورت قاۋىمداستىعى، پارلامەنت دەپۋتتارىمەن بىرىگىپ قوستاناي جىلقىلارىن كوبەيتۋ ماقساتىندا زاڭ جوباسىن ازىرلەپ، ءقازىر ماجىلىستە قارالىپ جاتىر.
ۇلتتىق سپورتتى كەڭىنەن ناسيحاتتاپ جاڭا بەلەسكە كوتەرۋ – ءبىزدىڭ باستى مىندەتتەرىمىزدىڭ ءبىرى. وسى ماقساتتا بيىل اقپارات وكىلدەرى اراسىندا ALAMAN – مەديا بايقاۋىن جاريالادىق. بۇل حالىقارالىق بايقاۋ كەلەر جىلدىڭ ناۋرىز ايىنا دەيىن جالعاسادى.
سونداي-اق وسى جىلى ۇلتتىق سپورت قاۋىمداستىعىنىڭ يۋتۋب كانالى اشىلدى. بۇل – ءبىز ءۇشىن قۋانىشتى حابار. كانالدىڭ ماقساتى – ۇلتتىق سپورت تۇرلەرىن كەڭىنەن ناسيحاتتاۋ جانە ۇلتتىق سپورتتىڭ ۇزدىكتەرىن حالىققا تانىتۋ.
جۋىردا 10-شى التىن تۇعىر نوميناسياسى ءوتىپ، ەڭ مىقتى سپورتشىلار مەن باپكەرلەردى ماراپاتتادىق. بۇل – ەل ىشىندە جانە حالىقارالىق جارىستاردا جەتىستىككە جەتكەن سپورتشىلارعا قۇرمەت كورسەتۋ، ءارى ۇلتتىق قۇندىلىعىمىزدى دارىپتەۋ ماقساتىندا ۇيىمداستىرىلاتىن جوبا.
ەڭ ماڭىزدىسى – كەلەسى جىلى ەلىمىزدە وتەتىن V دۇنيەجۇزىلىك كوشپەندىلەر ويىنىنا قىزۋ دايىندىق جۇمىستارىن جۇرگىزىپ جاتىرمىز. بايقاساڭىزدار، بۇل ويىندار ۇلتتىق سپورتتىڭ وليمپياداسىنا اينالىپ كەلەدى. ءقازىر دۇنيەجۇزىلىك كوشپەندىلەر ويىندارىنىڭ باعدارلاماسىنا سپورتتىڭ 20 ءتۇرى كىرەدى.
V دۇنيەجۇزىلىك كوشپەندىلەر ويىنىنا 100 مەملەكەتتەن 3 مىڭنان استام سپورتشى، 15 مىڭنان اسا شەتەلدىك تۋريست كەلەدى دەپ جوسپارلانعان. ءبىز وسى ارقىلى تەك ۇلتتىق سپورتىمىزدى عانا ەمەس، الەمدىك مادەني كەڭىستىكتەگى قازاقستاننىڭ جاڭاشىل كەلبەتىن تانىتۋعا تاماشا مۇمكىندىككە قول جەتكىزەمىز.
