ۇلتتىق قور قاراجاتىنا بىرنەشە مەملەكەتتىك ورگان جاۋاپتى. بۇل تۋرالى قازاقستان ۇلتتىق بانكى LS باسىلىمىنىڭ ساۋالىنا جاۋابىندا حابارلادى. 

ماسەلەن، قور اكتيۆتەرىن ينۆەستيسيالىق باسقارۋدى قازاقستان ۇلتتىق بانكى جۇزەگە اسىرادى. 2025 جىلدىڭ قورىتىندىسى بويىنشا تابىستىلىق 15%-عا (8،7 ملرد دوللار) جەتىپ، سوڭعى ءۇش جىلداعى ينۆەستيسيالىق تابىس 19،5 ملرد دوللار بولدى.

ال قاراجاتتىڭ ماقساتتى ءارى ءتيىمدى جۇمسالۋىنا ۇكىمەت پەن بيۋدجەتتىك باعدارلامالاردىڭ اكىمشىلەرى جاۋاپ بەرەدى. ۇلتتىق قوردان قاراجات رەسپۋبليكالىق بيۋدجەتكە كەپىلدەندىرىلگەن جانە نىسانالى ترانسفەرتتەر تۇرىندە بولىنەدى، ال ولاردى جوسپارلاۋ مەن يگەرۋ جالپى بيۋدجەتتىك پروسەسكە كىرىكتىرىلگەن.

قاراجاتتىڭ جۇمسالۋىن باقىلاۋ بولەك باعىت رەتىندە جۇزەگە اسىرىلادى. بۇل مىندەتتى جوعارى اۋديتورلىق پالاتا جانىنداعى ارنايى كوميسسيا اتقارادى. ول قارجىلىق اۋديتتەن باستاپ جوبالاردىڭ تيىمدىلىگىن باعالاۋعا دەيىنگى بارلىق كەزەڭگە مونيتورينگ جۇرگىزەدى.

ايتا كەتۋ كەرەك، بۇعان دەيىن جوعارى اۋديتورلىق پالاتا ۇلتتىق قوردى باسقارۋدا ءبىرىڭعاي ورتالىقتىڭ جوق ەكەنىن اتاپ وتكەن بولاتىن. وسىدان كەيىن ب ا ق تاراپىنان قورداعى قاراجاتتىڭ قالاي باسقارىلىپ، قالاي باقىلاناتىنى تۋرالى سۇراقتار تۋىنداعان.

ۇلتتىق بانكتىڭ مالىمەتىنشە، فۋنكسيالاردى ءبولۋ مودەلى وسىلاي تاڭدالعان جانە ول اشىقتىق، ەسەپتىلىك پەن تيىمدىلىك قاعيداتتارىنا نەگىزدەلگەن. ءاربىر قۇرىلىم ينۆەستيسيادان باستاپ قاراجاتتى تۇپكىلىكتى پايدالانۋعا دەيىنگى ءوز باعىتىنا جاۋاپ بەرەدى.