رەسپۋبليكالىق ناۋرىز مەرەكەسىنە ارنالعان ونكۇندىك شەڭبەرىندە 18 ناۋرىز – ۇلتتىق كيىم كۇنىندە جامبىل اتىنداعى قازاق مەملەكەتتىك اكادەميالىق فيلارمونياسىندا قازاقتىڭ ۇلتتىق كيىمدەرىن دارىپتەيتىن فەستيۆال ءوتتى. ءىس-شارانىڭ ماقساتى – قازاقتىڭ ۇلتتىق كيىم ۇلگىلەرىن ناسيحاتتاۋ ارقىلى كۇندەلىكتى قولدانىسقا ەنگىزۋگە ىقپال ەتۋ جانە وسى باعىتتا جۇمىس ىستەپ جاتقان ديزاينەرلەردى ىنتالاندىرۋ.
فەستيۆالگە ۇلتتىق بولمىستى ايشىقتاۋعا بەلسەندى ۇلەس قوسىپ جۇرگەن قازاقستاننىڭ ەڭبەك سىڭىرگەن قايراتكەرى، ق ر ديزاينەرلەر وداعىنىڭ مۇشەسى، سۋرەتشى-ديزاينەر، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «ءسان جانە كيىم ديزاينى» كافەدراسىنىڭ مەڭگەرۋشىسى جۇماعالييەۆ ءمۇسىلىم سادىق ۇلى،قازاقستان ەتنوديزاينەرلەر وداعىنىڭ پرەزيدەنتى، قازاقستان ۇلتتىق ديزاين اكادەمياسىنىڭ اكادەميگى، قۇرمەتتى ديزاينەر-ەۋروپا كونسورسۋمىنىڭ «التىن ساپا» مەدالىنىڭ يەگەرى، «دارىن» مەملەكەتتىك جاستار سىيلىعىنىڭ يەگەرى، ق ر مادەنيەت سالاسىنىڭ ۇزدىگى جاپاروۆا سالتانات امينوۆنا، ەلىمىزگە تانىمال ديزاينەر ايبەك ەڭسەپوۆ،«ابىروي كZ» ۇلتتىق كيىمدەر اتەلەسىنىڭ ديرەكتورى تەرلىكبايەۆا قۇرالاي ءابدىلدا قىزى، «ارۋ.كZ» ۇلتتىق كيىمدەر اتەلەسىنىڭ ديزاينەرى تەلەگينا ەلەنا جانە ديرەكتورى نۇرگۇل سەيتبەكوۆا، «Tamyr» برەندىنىڭ نەگىزىن قالاۋشى، كرەاتيۆتى كونسۋلتانت، سۋرەتشى، ديزاينەر چاپاي دياس ناريمان ۇلى جانە ب ا ق وكىلدەرى قاتىستى.
حالىقارالىق جانە رەسپۋبليكالىق بايقاۋلاردىڭ لاۋرەاتى اسەل اتابەكتىڭ ورىنداۋىنداعى «ناۋرىز-دۋمان» انىمەن اشىلعان كەش ءسان كورسەتىلىمىنە ۇلاستى. كورسەتىلىم يتاليانىڭ ميلان، ۆەنەسيا قالالارىنداعى ءسان كورسەتىلىمدەرىنە قاتىسىپ، ۇلتتىق كيىم ۇلگىلەرىمەن الەمدى تامساندىرىپ جۇرگەن الماتى قالاسى «بەلسەندى ۇزاق ءومىر» ورتالىعىنىڭ «الماتى اجەلەرىنىڭ» ەرەكشە توپتاماسىمەن اشىلدى. ادەمى قارتتىق ۇلگىسىن ۇلتتىق بوياۋى قانىق كيىمدەرىمەن ايشىقتاي بىلگەن اتا-اجەلەرىمىزگە كوپشىلىكتىڭ قۇرمەتى ەرەك بولدى.
ال ەتنو-ديزاينەر، ق ر ديزاينەرلەر وداعىنىڭ مۇشەسى باقىت قىزىر قىزى «ايپارا» توپتاماسى ارقىلى قازاق ۇل-قىزىنىڭ قايتالانباس كيىم ۇلگىسىندەگى كوركەمدىكتى، ەرەكشەلىكتى، وزىندىك سۇلۋلىقتى جاڭاشىل كوزقاراسپەن ۇيلەستىرە بىلگەن.
جاس تا بولسا بيىكتى باعىندىرىپ جۇرگەن ەتنو-ديزاينەر ازبەرگەن نۋرشايم اسىلبەك قىزىنىڭ ادام مەن تابيعاتتىڭ ۇيلەسىمدىلىگىن، گارمونياسىن سەزدىرە بىلگەن «سامعاۋ» توپتاماسى زاماناۋيلىقتىڭ جارقىن ۇلگىسى بولدى. «ەتنو-ەراتو 2019» ءححى ەۋرازيالىق جوعارى ءسان ۇلتتىق كيىمدەر بايقاۋىندا، سونداي-اق ماسكەۋدە وتكەن ءحىح حالىقارالىق بايقاۋدا «رەترو» نوميناسياسى بويىنشا ەكىنشى ورىندى يەلەنگەن بۇل توپتاما ۇلتتىق كيىمنىڭ ەۆروپالىق ۇلگىمەن ۇيلەسىمدىلىگىن بايقاتا الدى.
الماتى ءسان جانە ديزاين كوللەدجىنىڭ ستۋدەنتتەرى مەن وقۋ ءوندىرىس شەبەرىنىڭ قولىمەن دايىندالعان نەسىبەلى احمەتوۆانىڭ «ساپۋرا» توپتاماسى كورەرمەندەرگە جىلۋلىق پەن جايلىلىق سىيلادى. ماسكەۋدە وتكەن «ەتنو-ەراتو» بايقاۋىنىڭ ءى-شى ورىن يەگەرى جانە جاس وركەن حالىقارالىق جاس ديزاينەرلەر بايقاۋىنىڭ جەڭىمپازى بولعان بۇل توپتاما ۇلتتىق كيىم مۇراسىنىڭ ماڭىزدىلىعىن ارتتىرا ءتۇستى.
الماتى ءسان جانە ديزاين كوللەدجىنىڭ ستۋدەنتتەرى مەن وقۋ ءوندىرىس شەبەرلەرى بىرلەسە دايارلانعان ايسۇلۋ امانتايدىڭ «اي قىز» توپتاماسى شىعىس قىزدارىنىڭ، ونىڭ ىشىندە قازاق قىزىنىڭ كيىم ۇلگىسىن زامان تالابىنا ساي تىگىلگەن نۇسقامەن ايشىقتاپ بەردى. تاراز قالاسىندا وتكەن «اسپارا Fashion week» بايقاۋىنىڭ 1 ورىن يەگەرى، رەسپۋبليكالىق ديزاينەرلەر بايقاۋى، ءسان مۇناراسى بايقاۋىنىڭ جەڭىمپازى بولعان بۇل توپتاما ەۆروپالىق برەندتەرمەن ۇزەڭگى قاعىستىرا الاتىنداي دارەجەسىن كورسەتە الدى.
كەلەسى كەزەكتە كورسەتىلگەن ت.جۇرگەنوۆ اتىنداعى ونەر كوللەدجىنىڭ كيىم ديزاينى ءبولىمىنىڭ 3 كۋرس ستۋدەنتتەرى، جاس ديزاينەرلەر اناربەك جانسايانىڭ «جاڭا تىنىس»، ايتمۋحامبەتوۆا كوركەمنىڭ «كوكتەم سامالى» توپتامالارى دا ەرەكشە ءىلتيپاتقا يە بولدى.
فەستيۆالدى فيلارمونيا ونەرپازدارى انمەن ارلەپ، جىرمەن كومكەردى.
ءىس-شارا سوڭىندا فيلارمونيا ديرەكتورى اقان ابدۋالييەۆ بارلىق قاتىسۋشىلارعا العىسىن ءبىلدىرىپ، ۇلتتىق كيىمدى تەك توي-تومالاق، ناۋرىز ايىندا عانا ەمەس، كۇندەلىكتى تۇرمىس سالتىمىزعا ەنگىزۋگە شاقىردى.
زاماناۋي تالاپقا ساي جاڭارتىلىپ، سانگە ەنىپ جاتقان كيىمدەردىڭ ءقادىرىن ارتتىرىپ، قۇتىن اسىرۋ وزىمىزگە بايلانىستى ەكەندىگىن جەتكىزدى. بەلسەنە قاتىسۋشىلارعا فيلارمونيا اتىنان «العىس حات» پەن سەرتيفيكات جانە كادەسىي تابىس ەتىلدى.
وسىلايشا ۇلتتىق كيىم كۇنى ارقىلى حالىق رۋحىنىڭ شۇعىلاسى شاشىلىپ، ۇلتتىق ديزايننىڭ كوركەمدىگى مەن قايتالانباس ورنەگى تامساندىرىپ، قازاقتىڭ باي مۇراسىنان شابىت العان كۇن بولدى. ءداستۇر مەن ءستيلدى ۇشتاستىرا بىلگەن جاس تالانتتاردى قاناتتاندىرعان مۇنداي ءىس-شارالار حالىق مۇراسىنىڭ ماڭىزدىلىعىن ارتتىرا تۇسەرى انىق.
مەرۋەرت ماۋلەت قىزى،
جۋرناليست
جۋرناليست
