Respýblikalyq Naýryz merekesine arnalǵan onkúndik sheńberinde 18 naýryz – Ulttyq kiim kúninde Jambyl atyndaǵy qazaq memlekettik akademiialyq filarmoniiasynda qazaqtyń ulttyq kiimderin dáripteitin festival ótti. Is-sharanyń maqsaty – qazaqtyń ulttyq kiim úlgilerin nasihattaý arqyly kúndelikti qoldanysqa engizýge yqpal etý jáne osy baǵytta jumys istep jatqan dizainerlerdi yntalandyrý.
Festivalge ulttyq bolmysty aishyqtaýǵa belsendi úles qosyp júrgen Qazaqstannyń eńbek sińirgen qairatkeri, QR dizainerler odaǵynyń múshesi, sýretshi-dizainer, T.Júrgenov atyndaǵy Qazaq Ulttyq óner akademiiasynyń «Sán jáne kiim dizainy» kafedrasynyń meńgerýshisi Jumaǵaliev Músilim Sadyquly,Qazaqstan Etnodizainerler odaǵynyń prezidenti, Qazaqstan Ulttyq dizain Akademiiasynyń akademigi, qurmetti dizainer-Eýropa konsortsýmynyń «Altyn sapa» medaliniń iegeri, «Daryn» Memlekettik jastar syilyǵynyń iegeri, QR Mádeniet salasynyń úzdigi Japarova Saltanat Aminovna, elimizge tanymal dizainer Aibek Eńsepov,«Abyroi KZ» Ulttyq kiimder atelesiniń direktory Terlikbaeva Quralai Ábdildáqyzy, «Arý.KZ» Ulttyq kiimder atelesiniń dizaineri Telegina Elena jáne direktory Nurgúl Seitbekova, «Tamyr» brendiniń negizin qalaýshy, kreativti konsýltant, sýretshi, dizainer Chapai Dias Narimanuly jáne BAQ ókilderi qatysty.
Halyqaralyq jáne respýblikalyq baiqaýlardyń laýreaty Ásel Atabektiń oryndaýyndaǵy «Naýryz-dýman» ánimen ashylǵan kesh sán kórsetilimine ulasty. Kórsetilim Italiianyń Milan, Venetsiia qalalaryndaǵy sán kórsetilimderine qatysyp, ulttyq kiim úlgilerimen álemdi tamsandyryp júrgen Almaty qalasy «Belsendi uzaq ómir» ortalyǵynyń «Almaty ájeleriniń» erekshe toptamasymen ashyldy. Ádemi qarttyq úlgisin ulttyq boiaýy qanyq kiimderimen aishyqtai bilgen ata-ájelerimizge kópshiliktiń qurmeti erek boldy.
Al etno-dizainer, QR dizainerler odaǵynyń múshesi Baqyt Qyzyrqyzy «Aipara» toptamasy arqyly qazaq ul-qyzynyń qaitalanbas kiim úlgisindegi kórkemdikti, erekshelikti, ózindik sulýlyqty jańashyl kózqaraspen úilestire bilgen.
Jas ta bolsa biikti baǵyndyryp júrgen etno-dizainer Ázbergen Nýrshaim Asylbekqyzynyń adam men tabiǵattyń úilesimdiligin, garmoniiasyn sezdire bilgen «Samǵaý» toptamasy zamanaýilyqtyń jarqyn úlgisi boldy. «Etno-Erato 2019» HHI Eýraziialyq joǵary sán ulttyq kiimder baiqaýynda, sondai-aq Máskeýde ótken HIH halyqaralyq baiqaýda «Retro» nominatsiiasy boiynsha ekinshi oryndy ielengen bul toptama ulttyq kiimniń evropalyq úlgimen úilesimdiligin baiqata aldy.
Almaty sán jáne dizain kolledjiniń stýdentteri men oqý óndiris sheberiniń qolymen daiyndalǵan Nesibeli Ahmetovanyń «Sapýra» toptamasy kórermenderge jylýlyq pen jailylyq syilady. Máskeýde ótken «Etno-Erato» baiqaýynyń I-shi oryn iegeri jáne Jas órken Halyqaralyq jas dizainerler baiqaýynyń jeńimpazy bolǵan bul toptama ulttyq kiim murasynyń mańyzdylyǵyn arttyra tústi.
Almaty sán jáne dizain kolledjiniń stýdentteri men oqý óndiris sheberleri birlese daiarlanǵan Aisulý Amantaidyń «Ai qyz» toptamasy shyǵys qyzdarynyń, onyń ishinde qazaq qyzynyń kiim úlgisin zaman talabyna sai tigilgen nusqamen aishyqtap berdi. Taraz qalasynda ótken «Aspara Fashion week» baiqaýynyń 1 oryn iegeri, Respýblikalyq dizainerler baiqaýy, Sán munarasy baiqaýynyń jeńimpazy bolǵan bul toptama evropalyq brendtermen úzeńgi qaǵystyra alatyndai dárejesin kórsete aldy.
Kelesi kezekte kórsetilgen T.Júrgenov atyndaǵy óner kolledjiniń kiim dizainy bóliminiń 3 kýrs stýdentteri, jas dizainerler Anarbek Jansaianyń «Jańa Tynys», Aitmýhambetova Kórkemniń «Kóktem samaly» toptamalary da erekshe iltipatqa ie boldy.
Festivaldi filarmoniia ónerpazdary ánmen árlep, jyrmen kómkerdi.
Is-shara sońynda filarmoniia direktory Aqan Abdýaliev barlyq qatysýshylarǵa alǵysyn bildirip, ulttyq kiimdi tek toi-tomalaq, naýryz aiynda ǵana emes, kúndelikti turmys saltymyzǵa engizýge shaqyrdy.
Zamanaýi talapqa sai jańartylyp, sánge enip jatqan kiimderdiń qadirin arttyryp, qutyn asyrý ózimizge bailanysty ekendigin jetkizdi. Belsene qatysýshylarǵa filarmoniia atynan «Alǵys hat» pen sertifikat jáne kádesyi tabys etildi.
Osylaisha ulttyq kiim kúni arqyly halyq rýhynyń shuǵylasy shashylyp, ulttyq dizainnyń kórkemdigi men qaitalanbas órnegi tamsandyryp, qazaqtyń bai murasynan shabyt alǵan kún boldy. Dástúr men stildi ushtastyra bilgen jas talanttardy qanattandyrǵan mundai is-sharalar halyq murasynyń mańyzdylyǵyn arttyra túseri anyq.
Merýert Máýletqyzy,
jýrnalist
jýrnalist
