ق ر ۇلتتىق بانكى ەل ازاماتتارىن ساق بولۋعا شاقىرادى، سەبەبى الاياقتار جالعان قۇجاتتار مەن رەكۆيزيتتەردى، سونداي-اق جالعان ءموبيلدى قوسىمشالار مەن الەۋمەتتىك جەلىدەگى پاراقشالاردى پايدالانىپ، جۇرتتى الداۋعا كوشكەن. الاياقتاردىڭ كوزدەيتىنى – ازاماتتاردىڭ جەكە شوتىنا، دەپوزيتىنە، اقشا اۋدارىمدارىنا قول جەتكىزۋ جانە اتىنا ونلاين نەسيە نەمەسە ميكروكرەديت راسىمدەۋ ەكەنىن تاعى دا ەسكەرتىلەدى، دەپ حابارلايدى Dalanews.kz.
"ولار ءوزىن ۇلتتىق بانكتىڭ، مەملەكەتتىك نەمەسە قۇقىق قورعاۋ ورگاندارىنىڭ، ەكىنشى دەڭگەيلى بانكتەردىڭ، ۇيالى بايلانىس وپەراتورىنىڭ نەمەسە كوممۋنالدىق قىزمەتتىڭ قىزمەتكەرىمىز دەپ تانىستىرۋى مۇمكىن. سونداي-اق، ازاماتتارعا ءتۇرلى سىلتاۋمەن حابارلاسىپ، جالعان قۇجاتتار مەن بانككە اقشا اۋدارۋعا ارنالعان رەكۆيزيتتەر جىبەرۋى ىقتيمال. الاياقتار سىزگە كەلگەن SMS-حابارلامانى، راستاۋ كودىن جىبەرۋدى، كۇماندى سىلتەمەلەرگە كىرىپ، ءتۇرلى قوسىمشالاردى جۇكتەپ الۋدى نەمەسە مەسسەندجەردەگى جاڭا فۋنكسيالاردى ىسكە قوسۋدى سۇرايدى. ونىڭ ءبارى – تەلەفونىڭىزداعى بارلىق اقپاراتقا تولىق قول جەتكىزۋ ءۇشىن جاسالاتىن قۋلىق. سول سەبەپتى قازاقستان ۇلتتىق بانكى ازاماتتاردى بارىنشا ساق بولۋعا شاقىرادى. كەز كەلگەن قوڭىراۋ، حات، حابارلاما نەمەسە سۇراۋ سالعان كەزدە ونىڭ راس-وتىرىگىن مىندەتتى تۇردە تەكسەرىپ العان ءجون. كۇماندى سىلتەمەلەرگە وتپەڭىز، ءوزىڭىز بىلمەيتىن قوسىمشالاردى تەلەفونعا جۇكتەمەڭىز جانە بەيتانىس ادامداردىڭ شوتىنا اقشا اۋدارماڭىز"، دەلىنگەن ورتالىق بانك حابارلاماسىندا.
ۇلتتىق بانك قىزمەتكەرلەرى جەكە تۇلعالارعا ەشقاشان اۋديو جانە ۆيدەوقوڭىراۋ شالمايدى، جەكە شوتتارىن جۇرگىزبەيدى، قانداي دا ءبىر ينۆەستيسيالىق قورلارعا نەمەسە قارجى ونىمدەرىنە ينۆەستيسيا سالۋعا شاقىرمايدى، قاراجات كوزىن ساقتاندىرمايدى جانە حالىقپەن اقشالاي ەسەپ ايىرىسپايدى – وسىنى ءاردايىم ەستە ۇستاعان دۇرىس.
ەگەر الاياقتارعا تاپ بولساڭىز، دەرەۋ قازاقستان رەسپۋبليكاسىنىڭ قۇقىق قورعاۋ ورگاندارىنا جۇگىنىپ، ارىز جازۋعا كەڭەس بەرەمىز.
قوسىمشا كەڭەس الۋ ءۇشىن 1477 قىسقا ءنومىرى ارقىلى ۇلتتىق بانكتىڭ بايلانىس ورتالىعىنا حابارلاسا الاسىز.
