ق ر ۇلتتىق بانكى تءوراعاسىنىڭ كەڭەسشىسى، سيفرلىق ترانسفورماسيا باسشىسى بينۋر جالەنوۆ تەلەفون ءنومىرى مەن بءىرىڭعاي QR-كود بويىنشا بانكارالىق اۋدارىمداردى ىسكە قوسۋ جونىندەگى جوبانىڭ جايىنا توقتالدى. ول ۇلتتىق بانك ازىرلەگەن بۇل جۇيە 2024 جىلدىڭ 15 قاراشاسىندا پيلوتتىق رەجيمدە ىسكە قوسىلعانىن دا ناقتىلادى، دەپ حابارلايدى Dalanews.kz.
"بۇگىندەرى بانكتەردى كەزەڭ-كەزەڭىمەن قوسۋ پروسەسى ءجۇرىپ جاتىر. بۇگىنگى تاڭدا 9 بانكپەن وسى جۇيەنىڭ وپەراتورى - ۇلتتىق تولەم كورپوراسياسى شارت جاساستى. ماۋسىم ايىندا العاشقى بەس بانكتىڭ كليەنتتەرى ءۇشىن تەلەفون ءنومىرى بويىنشا بانكارالىق اۋدارىمدار قولجەتىمدى بولادى دەپ ۇمىتتەنەمىز. بۇل بانكتەردىڭ قاتارىندا Halyk، Freedom، RBK، Altyn جانە Home CREDIT بار"، – دەپ اتاپ ءوتتى ۇلتتىق بانكتىڭ بريفينگى بارىسىندا بينۋر جالەنوۆ.
بارلىق بانكتەردىڭ جاڭا تولەم ەكوجۇيەسىنە تولىق ينتەگراسيالانۋىن قامتاماسىز ەتۋ ءۇشىن ۇلتتىق بانك "بانكتەر تۋرالى" جاڭا زاڭ اياسىندا زاڭناماعا تۇزەتۋلەر ەنگىزۋگە باستاماشى بولدى. قازاقستاندا بارلىق قولما-قول اقشاسىز وپەراسيالاردىڭ 90%-ى ينتەرنەت جانە ءموبيلدى بانكينگ ارقىلى جۇزەگە اسىرىلادى، بۇل سيفرلىق ارنالاردىڭ قارقىندى دامىپ كەلە جاتقانىن تانىتادى.
