وتاندىق تەلە-راديو ارنالار مەن ولاردىڭ ينتەرنەت رەسۋرستارى جانە الەۋمەتتىك جەلىلەردە تىكەلەي ەفيردە كورسەتىلەتىن شارا تاڭعى ساعات 09:00-دەن باستالىپ تۇنگى 01:00-گە دەيىن جالعاسادى.
مارافونعا ساياساتكەرلەر، ساياساتتانۋشىلار مەن دەپۋتاتتار، قوعام قايراتكەرلەرى، مادەنيەت، سپورت سالاسىنىڭ وكىلدەرى، بەلسەندى جاستار جانە بلوگەرلەر قاتىسادى. جوبانى ەلىمىزگە ەسىمى كەڭىنەن تانىمال 27 تەلەجۋرناليست جۇرگىزەدى.
تەلەمارافوندا ءتۇرلى تاقىرىپتاردا ديسكۋسسيالار ۇيىمداستىرىلىپ، ەلىمىزدىڭ بارلىق ايماعىنان جانە شەتەلدەردەن تىكەلەي قوسىلىمدار جاسالادى.
سونداي-اق ەلەكتوراتتىڭ ساياسي بەلسەندىلىگى بويىنشا ساعات سايىن باسپا ءسوز كونفەرەنسيالارى ۇيىمداستىرىلىپ، حالىقارالىق بايقاۋشىلار، ساراپشىلار، باس پروكۋراتۋرا، ىشكى ىستەر مينيسترلىگىنىڭ وكىلدەرى داۋىس بەرۋ بارىسى بويىنشا سوڭعى اقپاراتتارمەن ءبولىسىپ وتىرادى.
مارافوننىڭ TED-x فورماتىنداعى الاڭىندا ق ر وقۋ-اعارتۋ ءمينيسترى اسحات ايماعامبەتوۆ، ق ر عىلىم جانە جوعارى ءبىلىم ءمينيسترى ساياسات نۇربەك، ق ر سيفرلىق دامۋ جانە اەروعارىش ونەركاسىبى ءمينيسترى باعدات مۋسين، «قازاقستاندىق نيك ۆۋيچيچ» ءالي تۇرعانبەكوۆ جانە باسقا دا تانىمال تۇلعالاردىڭ موتيۆاسيالىق مونولوگتارى جوسپارلانعان. ال «ەكسپرەسس-كامەرا» الاڭىندا جۋرناليستەرگە مارافونعا قاتىساتىن 1500-دەن استام قوناقپەن سۇحبات جۇرگىزۋگە مۇمكىندىك جاسالادى.
شارا بارىسىندا ميراس جۇگىنىسوۆ، داستان ورازبەكوۆ، مارجان اراپبايەۆا، ءرۇحيا بايدۇكەنوۆا، ءمادي سىزدىقوۆ، سادراددين، كاليفورنيا سىندى ساحنا جۇلدىزدارى مەن تانىمال ستەنداپەرلەر ونەر كورسەتەدى.
ونلاين مارافون 20 قاراشا كۇنى استانا قالاسى «قازمەديا ورتالىعىنىڭ» كينوكونسەرت زالىندا وتەدى.
