بۇل تۋرالى وقك-دا وتكەن بريفينگىدە شقو اكىمى دانيال احمەتوۆ ايتتى.
"مەملەكەت باسشىسىنىڭ "ابايدىڭ 175 جىلدىعىن مەرەكەلەۋ تۋرالى" جارلىعىن جۇزەگە اسىرۋ ءۇشىن ارنايى تۇجىرىمداما جانە ايماقتىق ءىس-شارالار جوسپارى ازىرلەندى. ۇلى ۇستازدىڭ تويىن ويداعىداي وتكىزۋ جونىندە جۇمىس كوميسسياسى قۇرىلدى. كوميسسيا قۇرامىنا ءارتۇرلى قىزمەت سالاسىنىڭ وكىلدەرى – تاريحشىلار مەن ادەبيەتتانۋشىلار، قوعام قايراتكەرلەرى مەن جۋرناليستەر كىردى»، - دەدى شقو اكىمى دانيال احمەتوۆ.
اكىمنىڭ ايتۋىنشا، كەشەندى جوسپارعا كىرگەن ءىس-شارالاردىڭ باستى ماقساتى – ابايدىڭ مۇراسىن دارىپتەۋ، ونىڭ شىعارماشىلىق ويلارىن جان-جاقتى اشۋ جانە مۇنى الەمگە پاش ەتۋ.
«اباي جىلى اياسىندا باس-اياعى 560 شارا وتكىزەمىز. بۇدان بولەك كەلەسى جىلى كەمبريدج ۋنيۆەرسيتەتىنىڭ "Fitzwilliam" مۋزەيىندە اۋقىمدى "ۇلى دالا التىنى" اتتى كورمەسىن ۇيىمداستىرامىز.
ول كورمەنىڭ ءبىر بولىگى – ابايدىڭ مۇراسى مەن شىعارمالارىنا ارنالماق. كورمە كۇندەرى كەلەسى جىلدىڭ ماۋسىم ايىنان باستاپ تامىزعا دەيىن سوزىلادى. وسىلايشا اعىلشىندار مەن مۋزەي قوناقتارى ۇلى دالانىڭ تاريحىمەن تانىسادى»، - دەدى احمەتوۆ.
