ۇلىبريتانيا ۇكىمەتى رەسەيگە قارسى ەڭ ءىرى سانكسيالىق پاكەت ەنگىزىلەتىنىن مالىمدەدى. بۇل تۋرالى رەسمي اقپارات ۇلىبريتانيا ۇكىمەتىنىڭ سايتىندا جاريالاندى. جاڭا شەكتەۋلەر رەسەيدىڭ مۇنايدان تۇسەتىن تابىسىنا تىكەلەي سوققى بەرگەنى اتاپ وتىلگەن. مالىمەتكە سايكەس، رەسەيلىك مۇناي كىرىستەرى 2020 جىلدان بەرگى ەڭ تومەنگى دەڭگەيگە تۇسكەن، دەپ حابارلايدى Dalanews.kz.

نەگىزگى سوققى – مۇناي ەكسپورتىنا

سانكسيالار پاكەتىندەگى باستى نىسانا رەتىندە ترانسنەفت اتالدى. ءدال وسى كومپانيا ارقىلى رەسەي مۇناي ەكسپورتىنىڭ 80 پايىزدان استامى وتەدى.

سونداي-اق سانكسيا تىزىمىنە روساتوم قۇرىلىمدارى، ونىڭ ىشىندە رۋساتوم وۆەرسيز، گازپروم سپگ پورتوۆايا ەنگىزىلدى.

«كولەڭكەلى فلوت» پەن تانكەرلەر

جاڭا شەكتەۋلەر اياسىندا الەمدەگى ەڭ ءىرى «كولەڭكەلى فلوت» وپەراتورلارىنىڭ ءبىرى سانالاتىن 2Rivers جەلىسىنە قاتىسى بار 175 كومپانيا سانكسياعا ىلىكتى. سونىمەن قاتار رەسەي مۇنايىن سانكسيالاردى اينالىپ ءوتىپ تاسىمالداۋعا قاتىسقان 48 تانكەر «قارا تىزىمگە» ەنگىزىلدى.

بانك سەكتورىنا دا سوققى ءتيدى

سانكسيالار رەسەيدىڭ بانك سەكتورىن دا قامتىدى. شەكتەۋلەر مىنا قارجى ۇيىمدارىنا قولدانىلدى:
پوچتا بانك،
توچكا بانك،
ترانسكاپيتالبانك،
ابسوليۋت بانك،
سينارا بانك،
اۆەرس بانك،
لانتا-بانك،
فورا بانك،
اك بارس بانك.

شەتەلدىك كومپانيالار مەن ب ا ق

سونىمەن قاتار سانكسيا تىزىمىنە جۇڭگو، ءۇندىستان، تايلاند جانە بىرىككەن اراب امىرلىكتەرىندە تىركەلگەن ءبىرقاتار كومپانيالار ەنگىزىلدى.

بۇدان بولەك، گرۋزياداعى Imedi جانە POSTV تەلەارنالارىنا دا شەكتەۋ قويىلدى.

ۇلىبريتانيا بيلىگى بۇل سانكسيالار رەسەيدىڭ سوعىس جۇرگىزۋ مۇمكىندىگىن السىرەتىپ، اسىرەسە مۇناي مەن قارجى سەكتورىنداعى رەسۋرستارىن شەكتەۋدى كوزدەيتىنىن اتاپ ءوتتى.