ۋكراينانى جاۋلاپ الۋ جوسپارىن قولتىعىنا قىسا بارعان پۋتين مەن سي ءسزينپينىڭ كەزدەسۋى ۇزاققا سوزىلعان. كرەمل كوسەمى كوزدەگەن ماقساتىنا جەتىپ، قىتايدىڭ «رۇقساتىن» الىپ قايتقان. اقپاننىڭ 4ء-ى كۇنى وتكەن جۇزدەسۋدە سوعىستىڭ العىشارتى جاسالعان.
ءسوي دەگەن سوروس «پۋتين ءۇشىنشى دۇنيەجۇزىلىك سوعىستى باستاپ كەتتى...» دەيدى.
«رەسەي اگرەسسياسىنىڭ اقىرى وركەنيەتتىڭ كۇيرەۋىمەن اياقتالادى. ول قىتايدى ارقالانىپ وتىر. بەيجىڭنىڭ قولداۋىنسىز بوگدە ەلگە باسىپ كىرۋگە كرەملدىڭ ءداتى جەتپەس ەدى.
اقپاننىڭ باسىندا التى ساعات بويى اقىلداسقان پۋتين مەن سي ەكى ەل تاريحىندا بۇرىن-سوڭدى بولماعان اسا ماڭىزدى ساياسي قۇجاتقا قول قويادى. بۇل جولعى قۇجاتتىڭ سيپاتى، اۋقىمى الىس-بەرىس، بارىس-كەلىسپەن عانا شەكتەلمەيدى!
رەسەي مەن جۇڭگو ۋكراين ماسەلەسىندە بۇرا تارتپاۋعا ۋاعدالاسادى. اقش پەن باتىسقا بىرلەسە توتەپ بەرىپ، دەموكراتيانىڭ ءورىسىن تارىلتۋ تۋرالى كونسەنسۋسقا كەلەدى. جۇڭگو نەگە ءۇنسىز جاتىر دەمەڭىز، «ۇنسىزدىك» رەسەي اگرەسسياسىن قۇپتاۋدى بىلدىرەدى»، – دەيدى سوروس.
...
سي پۋتينگە ۋكراينانى تالقانداۋعا تولىق كارت-بلانش بەرگەن. بەيجىڭ بيلەۋشىسىنە ءپۋتيننىڭ دەرتى جۇعىپ، قىتايدى كورگە كىرگەنشە باسقارۋدى كوزدەپ وتىر. بۇل ماسەلە بيىلعى جىلدىڭ سوڭىنا دەيىن رەتكە كەلۋى ءتيىس.
سوروستىڭ ايتۋىنشا سي وزىنە دەيىنگى ماو سزەدۋن جانە دەن سياپين سەكىلدى تاريحتا قالۋدى كوكسەيدى. بۇكىل بيلىكتى ۋىسىندا ۇستاعىسى كەلەتىن بەيجىڭ كوسەمى بۇل ويىن جۇزەگە اسىراتىن ءساتتى سەنارييدى دە سايلاپ قويعان.
«ءسيدىڭ قولداۋىنا يە بولعان كرەمل كوسەمى ءومىر بويى اڭساعان ارمانىن جۇزەگە اسىرۋعا قاۋىرت كىرىسىپ كەتتى. ول ءۇشىن قولىن قانعا مالۋدان تايىنبادى.
پۋتين دە ءسيدىڭ ساناتىندا ويلايدى. جاقىندا 70-كە تولاتىن ول ورىستىڭ جادىندا ساقتالىپ، تاريحتا قالعىسى كەلەدى. «بيىلدان كەشىكپەۋگە ءتيىسپىن، شيراق قيمىلداۋىم كەرەك. امەريكا الدىمدى وراپ كەتسە، ەرتەڭ بارماق شايناپ قالامىن» دەپ پايىمدايدى.
ءپۋتيننىڭ تۇسىنىگىندەگى رەسەي بۇگىنگى الەمنىڭ قالىبىنا سىيمايدى. كرەملدىڭ كونسەپسياسى ورىستى ورتاعاسىرعا ىسىرىپ تاستادى. ءپۋتيننىڭ ۇعىمىندا ورىس حالقى پاتشاعا مۇحتاج، پاتشانىڭ امىرىنە باعىنىپ، ىزىنە ىلەسىپ ءجۇرۋى ءتيىس. پاتشاعا قارسى كەلۋگە قۇقى جوق. پۋتين – پاتشا. ال بۇل دەموكراتيانىڭ قۇندىلىقتارىنا قايشى كەلەدى.
ورىس حالقى اسەرگە بەرىلگىش، پۋتين پروپاگانداسى ورىس حالقىن رۋحاني جارىمجان ۇلتقا اينالدىردى، ورىستىڭ جان-دۇنيەسى لاستاندى. اگرەسسيا ولاردىڭ دەنەسىنە تارالىپ كەتتى، – دەيدى سوروس.
...
ميللياردەر كرەمل باسشىسىن ءبىراز ۋاقىتتان بەرى بارلاپ، باقىلاپ جۇرگەنىن ايتادى. سوروستىڭ بىلۋىندە، پۋتين اياۋشىلىق سەزىمنەن ادا. ول شەشەن حالقىن جەر بەتىنەن جويىپ جىبەرە جازداعان، كييەۆتەگى ارەكەتى دە سوعان ۇقساس.
كگب-نىڭ شەكپەنىنەن شىققان ول سوڭعى 10-15 جىلدا ادام تانىماستاي وزگەرگەن. شىنايى ومىردەن تىم الشاق كەتكەن كرەمل ديكتاتورى كريتيكانى مۇلدەم قابىلداي المايدى. ونىڭ پرينسيپىنە قايشى پىكىر ايتقان ادامداردىڭ وققا ۇشۋى نەمەسە ءىس-تۇسسىز جوعالىپ كەتۋى سونىڭ دالەلى.
ۋكراينانى ەكى-ۇش كۇندە جاۋلاپ الارىنا سەنگەن پۋتين شىمبايىنا باتاتىن شىندىقپەن بەتپە-بەت كەلگەن.
«ول ءورىستىلدى ۋكراينداردان ءۇمىت كۇتتى. ولار ورىس سولداتتارىن قۇشاق جايا قارسى الارىنا سەنىمدى بولدى. ءورىستىلدى ۋكرايندار كييەۆتى كۇيرەتۋگە اتسالىسادى، ورىس وككۋپانتتارىنىڭ قاتارىنا قوسىلادى دەپ پايىمدادى.
ءىس جۇزىندە ءورىستىلدى ۋكرايننىڭ ۋكراين تىلىندە سويلەيتىن اۋديتوريادان ەش وزگەشىلىگى جوق. ولاردىڭ ءتىلى بولەك بولعانمەن، تانىم-تۇسىنىگى ءبىر. ۋكراين جەرىندەگى قوس ءتىلدى اۋديتوريا – ءپۋتيندى اگرەسسور دەپ تانيدى. كرەمل ۋكراين حالقى مۇنشالىقتى قارسىلىق كورسەتەرىن كۇتكەن جوق. كۇشى باسىم جاۋعا تويتارىس بەردى»، – دەيدى ميللياردەر سوروس.
...
ەستەرىڭىزدە بولسا، بىلتىرعى جىلدىڭ بەل ورتاسىندا پۋتين ورىس پەن ۋكرايننىڭ ءبىر ۇلت، ءبىر حالىق ەكەنىن دالەلدەپ باعىپ، كرەملدىڭ رەسمي سايتىندا وتىرىك-شىنى ارالاس سالاقۇلاش ماقالا جاريالاعان.
«رەسەيدىڭ ىرقىنا كونەتىن قاراپايىم حالىقتى نەوناسيستەر تۇزاقتا ۇستاپ وتىر. كييەۆ «ورىس الەمىنىڭ» كىندىگىندە ورنالاسقان قالا. ۋكراين حالقىن مايدانعا ماجبۇرلەپ الىپ شىقتى»، – دەگەن سىڭايدا سويلەگەن ەدى كرەمل كوسەمى.
سوروستىڭ توپشىلاۋىنشا پۋتين وسى ارقىلى ءوزى-وزىن جۇباتقىسى، الداعىسى كەلەدى. 2014 جىلعى دۇربەلەڭدە كۇللى ەل باتىسقا بەت بۇرعان.
كييەۆتىڭ ۋىستان شىعىپ كەتكەنىن مويىنداعىسى جوق ماسكەۋ ەركىندىككە ۇمتىلعان ۇلتتى بوداندىق قۇرساۋىندا ۇستاعىسى كەلەدى. باۋىرلاس ەلدى بىتىسپەس جاۋعا اينالدىرعان ءپۋتيننىڭ بۇل ويى ىسكە اسپايتىن سىڭايلى.
«كرەمل كۇشىنە سەندى. اسكەردىڭ كۇشىمەن كييەۆتىڭ مىسىن دەپ باسامىز ويلادى. سالانى ىشتەن ءىرىتىپ جاتقان كوررۋپسيانى ەسەپكە العان جوق. رەسەيدىڭ تۇبىنە جەتەتىن ەڭ ۇلكەن كەسەل – كوررۋپسيا. توناۋدىڭ كوكەسى ارميادا بولدى. مەمتاپسىرىس ۇستاعاننىڭ قولىندا، تىستەگەننىڭ اۋزىندا كەتتى. رەسەي ارمياسى كوتەرەم كۇيدە. بۇعان ءپۋتيننىڭ دە كوزى جەتتى.
ازۋىن ايعا بىلەگەن ورىس ارمياسى مەن ورىس تەحنيكاسىنىڭ كۇللى كوككە ۇشتى. سوعىستىڭ كەيىنگى كۇندەرى كرەمل كوسەمى اقىلىنان اداسا باستادى. اگرەسسياعا تويتارىس بەرگەن ۋكراينانى بەت الباتى بومبىلاۋعا كوشتى. سوعىستا دا ەرەجە بولادى-اۋ دەگەندى ۇمىتتى. ءپۋتيننىڭ قولىنان قازا تاپقان قاراپايىم تۇرعىنداردىڭ سانىندا ەسەپ جوق. 400 مىڭ تۇرعىنى بار ماريۋپول ەكى اپتا بويى اس-سۋسىز وتىر. رەسەي تۇبىندە جەڭىلەدى...»، – دەيدى سوروس.
ونىڭ پىكىرىنشە اقش پەن باتىس كييەۆكە جويعىش قارۋدى جەتكىزۋدى ۇدەتە تۇسەدى. سوعىس سوزىلا تۇسسە اسكەري ۇشاقتار مەن تىكۇشاقتار جەتكىزىپ بەرەدى.
ال پۋتين بولسا ءوزى دە اڭداماي باتىس الەمىن ءبىر جۇدىرىققا جۇمىلدىرعان. ەۋرووداق شىنايى ماندەگى ءبىرتۇتاس قۇرىلىمعا اينالعان. بۇدان بىلاي ناتو جاۋدىڭ قاي تۇستان تونەرىن انىق بىلەتىن بولادى.
«ال جۇڭگو شە؟ سيگە اقىل كىرگەن سىڭايلى. ءپۋتيننىڭ پاراناياسى اسقىنىپ كەتكەنىن كەش تە بولسا، اڭعارعان سىندى. فرانسيا پرەزيدەنتى ماكرون مەن نەمىس كانسلەرى شولسقا قوڭىراۋ شالعان سي باتىستىڭ «بىتىمگەرلىك ميسسياسىن» قولدايتىنىن مالىمدەدى. جۇڭگو گۋمانيتارلىق اپاتتىڭ الدىن-الۋعا مۇددەلى ەكەنىن ايتتى.
البەتتە، ءسيدىڭ ساتىپ كەتكەنىن سەزگەن پۋتين ۋكراينادان تۇرا قاشپاسى بەلگىلى. كرەمل كوسەمى كۇللى وركەنيەتتىڭ تۇبىنە جەتپەي تۇرا تاقتان تايۋى قاجەت...»، – دەيدى سوروس.
ازىرلەگەن، دۋمان بىقاي
