ۋكراينا باس پروكۋراتۋراسى ايدوس سادىقوۆقا جاسالعان شابۋىل تۋرالى مالىمدەمە جاسادى، - دەپ حابارلايدى Dalanews.kz.
ۋكراينا باس پروكۋرورى كەڭسەسى قازاقستاندىق ءجۋرناليستى ولتىرۋگە وقتالعان كۇدىكتىلەرگە قاتىستى ەكستراديسيالىق ءراسىمدى باستاعالى وتىر.
ۋكراينا تاراپى اسا اۋىر قىلمىسقا كۇدىكتى ەكى ادامدى ەكستراديسيالاۋ تۋرالى قازاقستان رەسپۋبليكاسىنىڭ قۇزىرەتتى ورگاندارىنا جۇگىنۋ ءۇشىن قۇجاتتار توپتاماسىن دا دايىنداپ جاتىر.
ايتا كەتەيىك، 2024 جىلعى 18 ماۋسىمدا كييەۆتە ەكى ادام ۋكراينادا بوسقىن مارتەبەسى بار قازاقستان ازاماتىن ولتىرۋگە وقتالعان.
"كۇدىكتىلەردىڭ ەكەۋى دە قازاقستان ازاماتتارى. ولار قىلمىس جاسالعان كۇنى ۋكراينا اۋماعىنان كەتكەن. ولارعا ادامدار توبىنىڭ تاپسىرىسى بويىنشا جانە الدىن الا ءسوز بايلاسۋ ارقىلى جاسالعان قاساقانا كىسى ولتىرۋگە وقتالعانى تۋرالى كۇدىك حابارلاندى جانە حالىقارالىق ىزدەۋگە جاريالاندى. سوتقا دەيىنگى تەرگەۋدى كييەۆ قالالىق پروكۋراتۋراسىنىڭ ءىس جۇرگىزۋ باسشىلىعىمەن كييەۆ قالاسىنداعى ۇلتتىق پوليسيا تەرگەۋ بولىمشەلەرى جۇزەگە اسىرادى"، - دەپ جازىلعان مالىمەتتە.
ايدوس سادىقوۆ ۋكراينادا رەسمي بوسقىن مارتەبەسىن العان. ال 2023 جىلدىڭ قازان ايىندا سادىقوۆقا قازاقستاندا "الەۋمەتتىك، ۇلتتىق، رۋلىق، تەكتىك-توپتىق نەمەسە ءدىني الاۋىزدىقتى قوزدىرعانى" ءۇشىن ىزدەۋ جاريالانعان بولاتىن.
بۇعان دەيىن ەرمۇرات باپي ايدوس سادىقوۆتى جاقسى بىلەتىنىن، ال "باسە" قاتارداعى وپپوزيسيالىق رەسۋرس ەكەنىن ايتتى. سونداي-اق، دەپۋتات بۇل قاستاندىققا قازاقستان بيلىگىنىڭ رەاكسياسى جونىندە، قازاقستاننىڭ ەندىگى ارەكەتى قانداي بولاتىنى تۋرالى پىكىر ءبىلدىردى.
"سادىقوۆتاردىڭ كاسىبي، ساياسي كوزقاراسى قالاي بولعانى ماڭىزدى ەمەس. ەڭ ماڭىزدىسى ول - قازاقستان ازاماتى. قاي جەردەن بارىپ ساياسي باسپانا السا، ول - ەكىنشى كەزەكتەگى ماسەلە. سوندىقتان قازاقستاننىڭ بيلىگى، قازاقستاننىڭ ءتيىستى مەملەكەتتىك ورگاندارى ۋكراينا تاراپىنا شىعىپ، بۇل ماسەلەگە ارالاسۋى كەرەك، سۇراۋ سالۋى كەرەك. بۇل حالىقارالىق دارەجەدە رەزونانس العان وقيعا عوي. ءبىر ەلدىڭ ازاماتىن ەكىنشى ءبىر ەلدە اتىپ كەتۋ دەگەن، ونىڭ ۇستىنە جۋرناليست بولسا، وپپوزيسيالىق رەسۋرستىڭ جەتەكشىسى بولسا، مىندەتتى تۇردە قازاقستاننىڭ تاراپى ارالاسۋى كەرەك. ەكىنشىدەن، قازاقستاننىڭ بۇعان ەشقانداي دا قاتىسى جوق ەكەنىن دالەلدەۋى كەرەك قوي. قازاقستان تاراپى ءۇنسىز قالاتىن بولسا، وندا باسقا دا پىكىر تۋۋى مۇمكىن. قازاقستاننىڭ بيلىگى بۇل ىسكە مىندەتتى تۇردە ارالاسىپ، ءىستىڭ ءمان-جايىن بىلۋگە ارەكەت ەتۋى كەرەك دەگەن ويىم بار"، - دەدى باپي.
ال پرەزيدەنت قاسىم-جومارت توقايەۆ قازاقستان بۇل ءىس بويىنشا تەرگەۋگە قاتىسۋعا دايىن ەكەنىن ايتتى.
"ەلىمىزدە زاڭ ۇستەمدىگىن نىعايتىپ جاتىرمىز، ياعني بارلىق سالادا، ەڭ الدىمەن، زاڭ ۇستەمدىگىن قامتاماسىز ەتۋ – باستى مىندەت. بۇل ماسەلە بويىنشا مەنىڭ كوزقاراسىم – ايقىن. مۇنى وزدەرىڭىز دە جاقسى بىلەسىزدەر. قازاقستاندا زاڭ مەن ءتارتىپ بارىنەن بيىك تۇرۋعا ءتيىس. سوندىقتان قوعامداعى بارلىق قاراما-قايشىلىقتار مەن كەلىسپەۋشىلىكتەردى تەك قانا قۇقىقتىق تۇرعىدان، ياعني ءتيىستى زاڭناماعا جانە نەگىزگى حالىقارالىق نورمالارعا سايكەس شەشۋ قاجەت. كەشە قازاقستان ازاماتى ايدوس سادىقوۆقا قاتىستى كييەۆتە بولعان قىلمىسقا دا ءدال وسى ۇستانىم تۇرعىسىنان قاراعان ءجون. مەن ديپلوماتيالىق ارنالار مەن قۇقىق قورعاۋ ورگاندارى ارقىلى وسى وقىس وقيعا بويىنشا رەسمي سۇراتۋلار جىبەرۋ تۋرالى ناقتى تاپسىرما بەردىم. سونداي-اق قاجەت بولعان جاعدايدا قازاقستاننىڭ رەسمي ورگاندارى ءىستىڭ اقيقاتىنا جەتۋگە جاردەم بەرۋ ءۇشىن تەرگەۋ جۇمىسىنا قاتىسۋعا دايىن ەكەنىن ايتقىم كەلەدى، – دەدى پرەزيدەنت."
