ۇكىمەت مەديسينالىق كومەكتىڭ ساپاسىن باسقارۋدى جەتىلدىرۋ جونىندەگى 2026–2030 جىلدارعا ارنالعان كەشەندى جوسپاردى بەكىتتى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى، دەپ حابارلايدى Dalanews.kz.
قۇجات دەرەكتەرگە، سيفرلىق قۇرالدارعا، جاساندى ينتەللەكت تەحنولوگيالارىنا نەگىزدەلگەن مەديسينالىق قىزمەت ساپاسىن باقىلاۋدىڭ جانە باسقارۋدىڭ زاماناۋي ۇلگىسىنە كوشۋگە باعىتتالعان.
جوسپار مەديسينالىق كومەكتىڭ ساپاسى مەن قاۋىپسىزدىگىن تۇراقتى تۇردە جاقسارتۋعا، پروسەستەردىڭ اشىقتىعىن قامتاماسىز ەتۋگە جانە رەتتەۋدىڭ تيىمدىلىگىن ارتتىرۋعا باعىتتالعان ءبىرقاتار جۇيەلى شارانى جۇزەگە اسىرۋدى قامتيدى.
قۇجاتتا جۇيەنى دامىتۋدىڭ ءتورت ستراتەگيالىق باعىتى انىقتالعان:
- مەديسينالىق قىزمەت كورسەتۋ سالاسىنداعى رەتتەۋشى قۇرالداردى جاڭعىرتۋ؛
- جاساندى ينتەللەكت تەحنولوگيالارىن قولدانا وتىرىپ، ساپا ساراپتاماسىنىڭ جاڭا مودەلىن قالىپتاستىرۋ جانە ۇلتتىق ساپا ينستيتۋتىن قۇرۋ؛
- كاسىبي مەديسينالىق قوعامداستىقتىڭ ءرولىن كۇشەيتۋ؛
- ساپانى باسقارۋ جۇيەسىنىڭ سيفرلىق ترانسفورماسياسى.
كەشەندى جوسپاردى جۇزەگە اسىرۋ ناتيجەسىندە 2030 جىلعا قاراي مەديسينالىق قىزمەتتەر ساپاسىنىڭ نەگىزگى كورسەتكىشتەرىن جاقسارتۋ كوزدەلىپ وتىر.
