ۇكىمەت كاسپييدى زەرتتەۋگە جانە ساقتاۋعا 1،1 ملرد تەڭگە ءبولدى، دەپ حابارلايدى Dalanews.kz.
پرەزيدەنتتىڭ كاسپييدى زەردەلەۋ جانە ساقتاۋ، سونداي-اق، ءوڭىردىڭ ەكولوگيالىق تۇراقتىلىعىن قولداۋ جونىندەگى تاپسىرماسىن ورىنداۋ شەڭبەرىندە ۇكىمەت رەزەرۆىنەن "كاسپيي تەڭىزى قازاق عىلىمي-زەرتتەۋ ينستيتۋتى" اق-عا 1،1 ملرد تەڭگە بولىنگەن.
ءتيىستى قاۋلىعا پرەمەر-مينيستر ولجاس بەكتەنوۆ قول قويدى. قارجىلاندىرۋ ينستيتۋتتىڭ عىلىمي الەۋەتىن جاقسارتۋعا ىقپال ەتەدى. قاراجاتقا تەڭىزدە مونيتورينگ جۇرگىزۋ ءۇشىن نەگىزگى جابدىقتاردى ساتىپ الۋ جانە گيدروبيولوگيالىق، گيدروحيميالىق زەرتحانالاردى جاراقتاندىرۋ جوسپارلانىپ وتىر.
وسى قاۋلىنى جۇزەگە اسىرۋ ءۇشىن ەكولوگيا جانە تابيعي رەسۋرستار مينيسترلىگىنە بارلىق شارانى قابىلداۋ، قارجى مينيسترلىگىنە بيۋدجەت قاراجاتى ماقساتتى پايدالانىلۋىن قاتاڭ باقىلاۋ تاپسىرىلدى.
