ەڭبەك جانە حالىقتى الەۋمەتتىك قورعاۋ مينيسترلىگى «دەكرەتكە ميلليونمەن» شىعۋ مۇمكىندىگىن الىپ تاستايدى. ياعني جۇكتىلىك پەن بوسانۋعا، سونداي-اق 1،5 جاسقا دەيىنگى بالا كۇتىمىنە بايلانىستى تولەمدەردى ەسەپتەۋ ەرەجەلەرىنە وزگەرىستەر ەنگىزدى، – دەپ حابارلايدى Dalanews.kz "كۋرسيۆ" باسىلىمىنا سىلتەپ.
مينيسترلىك مۇنداي قادامعا ەل اراسىندا «دەكرەتكە ميلليونمەن» دەپ اتالىپ كەتكەن ءتاسىل، ياعني كوبىرەك تولەم الۋ ءۇشىن تابىسىن ارتتىرۋ جاعدايلارىنىڭ جيىلەپ كەتۋىنەن كەيىن بارعان. جاڭا ەرەجە 8 ساۋىردەن باستاپ كۇشىنە ەنەدى.
مىناداي وزگەرىستەر بولماق:
1. بالا كۇتىمى بويىنشا ءبىرجولعى تولەم (حالىق اراسىندا – دەكرەتتىك تولەم اتالىپ كەتكەن سوما). بۇرىن ايەلدىڭ بىرنەشە جۇمىسى بولسا (مىسالى، ەكى قىزمەتتىك جۇمىس جانە جەكە كاسىپكەرلىگى)، ءارقايسىنان ماكسيمالدى تولەم الۋعا مۇمكىندىگى بار ەدى. ەندى جالپى سوما 2 249 100 تەڭگەدەن اسپاۋى كەرەك.
ويتكەنى ەندى تابىستى ەسەپتەگەندە، 7 ەڭ تومەنگى جالاقىعا (ەتج) دەيىنگى سوما عانا ەسكەرىلەدى. 2025 جىلى بۇل – ايىنا 595 000 تەڭگە. ەگەر تابىس ودان جوعارى بولسا نەمەسە بىرنەشە جۇمىسى بولسا دا، ءبارىبىر ەڭ كوبى 595 مىڭ تەڭگە رەتىندە ەسەپتەلەدى.
2. 1،5 جاسقا دەيىنگى بالا كۇتىمىنە اي سايىنعى تولەمدەر. بۇرىن دەكرەتتىك دەمالىسقا شىققاننان كەيىن، كەيبىر ايەلدەر اۋدارىمدارىن جالعاستىرىپ، تولەم مولشەرىن ارتتىرۋ مۇمكىندىگىن قولداناتىن. ەندى بۇل ءادىس ىستەمەيدى، قوسىمشا اۋدارىمدار ەسەپكە الىنبايدى.
