تيمۋر تىپىرشي باستادى: ۇكىمەتتەگى "قۇلىبايەۆتىڭ ادامدارى" قاجىگەلديننىڭ نازارىنا ىلىكتى

Dalanews 07 ماۋ. 2023 07:53 507

بۇعان دەيىن بورەيكوعا سۇحبات بەرگەن ەكس-پرەمەر "اكتيۆتەردى قايتارۋ تۋرالى زاڭعا قۇلىبايەۆتىڭ ادامدارى ارالاستى" دەگەن بولجام ايتقان. ماعجان ۇلىنىڭ پايىمداۋىنشا "تيمۋردىڭ كومانداسى" اتالعان زاڭ جوباسىن سۇيىلتىپ جىبەرۋگە مۇددەلى.

قاجىگەلديننىڭ نىساناسىنا ىلىككەن ازاماتتاردىڭ ەسىم-سويى كىم؟

DALA INSIDE وسى تاراپتا تاۋەلسىز زەرتتەۋ جۇرگىزۋگە تىرىستى.

"شەتتەگى اكتيۆتەردى قايتارۋ تۋرالى" زاڭنىڭ "چەرنوۆيگىن" قولمەن ۇستاپ، كوزبەن كورگەندەردىڭ ءبىرى – رۋستام ءجۇرسىنوۆ. بۇل كىم دەرسىز؟ ول ەلىمىزدەگى كاسىپكەرلەر قۇقىن قورعايتىن ارنايى ۋاكىل، بىلايشا ايتقاندا "بيزنەس ومبۋدسمەن".

اتالمىش زاڭ ءماجىلىس تالقىلاۋىنا تۇسپەي تۇرا ءجۇرسىنوۆتىڭ قولىنان وتكەن.

"بيزنەس ومبۋدسمەن" زاڭسىز اكتيۆتى "ىزدەۋ" مەن "كامپەسكەلەۋدىڭ" الگوريتمىمەن الدىن-الا اسىقپاي-cاسپاي تانىسىپ العان. بىزگە جەتكەن مالىمەت بويىنشا ءجۇرسىنوۆ زاڭگەرلەردىڭ كومەگىنە جۇگىنىپ، زاڭ جوباسىنىڭ ولقى تۇستارىن انىقتاۋعا تىرىسقان. كىم ءۇشىن، نە ءۇشىن، ول جاعى بىزگە بەلگىسىز…


زاڭسىز كاپيتالدى ەلگە قايتارۋ ماقساتىندا قۇرىلعان كوميسسيا قۇرامىندا باس پروكۋروردىڭ ورىنباسارى – ۇلان بايجانوۆ بار. قۇرىلىمنىڭ ەلەۋسىز مۇشەسى ەمەس، وسى كوميسسيا ءتوراعاسى توقايەۆتىڭ بىلدەي ءبىر "زام-ى".

وسى تۇستا  "اكتيۆتەردى قايتارۋ تۋرالى زاڭعا قۇلىبايەۆتىڭ ادامدارى تۇمسىق تىقتى" دەگەن قاجىگەلديننىڭ تۇسپالىن فاكچەكتەن وتكىزۋگە تۋرا كەلەدى. اكەجاننىڭ تۇيسىگى ادەتتەگىدەي الدەبىر شيكىلىكتى سەزسە كەرەك…

ءبىز ءسوز وتكەن ءجۇرسىنوۆ پەن بايجانوۆ تا "كۇيەۋبالانىڭ" سىرالعى سەرىكتەرى. قۇلىبايەۆ "قازمۇنايگازدىڭ" ورىنباسارى قىزمەتىن اتقارعان 2000-شى جىلدارى اتالعان جۇپ كارەرالىق باسپالداقپەن قارىشتاپ كوتەرىلدى.

ءجۇرسىنوۆ كەيىننەن تاعى سول قۇلىبايەۆ جەتەكشىلىك ەتكەن "قازەنەرجي" بيزنەس قاۋىمداستىعىنىڭ زاڭگەرلىك ءبولىمىن باسقاردى. "بيزنەس ومبۋدسمەن" اتانباي تۇرا، تاعى سول قۇلىبايەۆ باسقاراتىن "اتامەكەن" پالاتاسىنىڭ ۆيسە-پرەزيدەنتى بولدى.

DALA INSIDE ارناسىنا جەتكەن مالىمەت بويىنشا سوڭعى كەزدەرى تيمۋردان مازا كەتىپ، تىپىرشي باستاعان. كەشەگە دەيىن جاڭا قازاقستاننىڭ ساياسي ەليتاسى ساپىنداعى تامىر-تانىستارىنا ارقالانىپ كەلگەن قۇلىبايەۆ قاجىگەلدين تاراتقان ينسايدتىڭ سوڭى ايعاي-شۋعا ۇلاسا ما قاۋىپتەنەدى.


"اكتيۆتەردى قايتارۋ؟ الدىمەن "اتامەكەن" پالاتاسىنىڭ باسشىسىن، سول پالاتاعا مۇشە ازاماتتاردى تەكسەرىپ، ولاردىڭ اكتيۆتەرى مەن دۇنيە مۇلكىن تەرگەۋىمىز قاجەت"، – دەيدى وسى تۇستا ماعجان ۇلى.

ايتۋىنشا، باس پروكۋروردىڭ ورىنباسارى (كىمدى مەڭزەگەنىن تۇسىنگەن بولارسىزدار) ءوزىنىڭ شۆەيسارياداعى ءزاۋلىم سارايى تۋرالى ەل الدىندا ەسەپ بەرۋى قاجەت.

قاجىگەلدين؟ وعان قۇداي قۋات بەرسىن دەيمىز. ەكc-پرەمەر امەريكالىق لوببيستەردى اراعا سالىپ نازاربايەۆتىڭ كۇيەۋبالاسىن سانكسياعا مىقتاپ وتىرعىزۋدى ماقسات تۇتىپ وتىر.

ۇسىنىلعان
سوڭعى جاڭالىقتار