ساپارى بارىسىندا اتالعان تۇركيالىق كاسىپكەرلەر شىمكەنت قالاسىنداعى «وڭتۇستىك» يندۋستريالدى ايماق پەن ارنايى ەكونوميكالىق ايماقتىڭ مۇمكىندىكتەرىمەن وندا ورنالاسقان كاسىپورىنداردىڭ جۇمىسىمەن تانىسقان بولاتىن.
وڭىردە كاسىپكەرلىك سالاسىنىڭ دامىپ جاتقانىن العا تارقان تۇرىك دەلەگاتتارى مۇنان سوڭ، جەرگىلىكتى بيزنەسمەندەرمەن B2B فورماتىندا كەزدەستى. وندا ەكى جاق اۋىل شارۋاشىلىعىنداعى جاڭا تەحنولوگيالارعا ينۆەستيسيالار تارتۋ مەن ورتا جانە شاعىن بيزنەستى دامىتۋ جايىن ءسوز ەتتى.
كاسىپكەرلەرمەن بولعان بەتپە-بەت كەزدەسۋدە قوس تاراپ كەپتىرىلگەن جەمىستەر جانە ازىق-تۇلىككە ارنالعان قاپتاما ءوندىرۋ، جىلىجايعا ارنالعان جابدىقتار شىعارىپ، ورناتۋ، قۇرعاق قۇرىلىس قوسپالار مەن بوياۋ ونىمدەرىن ءوندىرۋ بويىنشا بىرلەسكەن جوبالاردى جۇزەگە اسىرۋ تۋرالى كەلىسىمگە كەلدى.
ايماق باسشىسى كەزدەسۋدە وبلىستىڭ ەكونوميكالىق الەۋەتى مەن كاسىپكەرلەرگە كورسەتىلىپ جاتقان مەملەكەتتىك قولداۋلاردى اتاپ ءوتتى.
– ءوڭىردىڭ الەۋمەتتىك-ەكونوميكالىق احۋالىمەن تانىسىپ، الەۋەتىن باعامداۋعا كەلگەن دەلەگاسيا مۇشەلەرىنە العىسىم شەكسىز. وڭتۇستىكتە شەتەلدىك ينۆەستورلارعا بارلىق قولايلى جاعدايلار جاسالىنىپ وتىر. الەۋەتى زور 11 ينۋدستريالدى ايماعىمىز بار. ودان بولەك اۋىل شارۋاشىلىعى، قۇرىلىس سالالارىندا دا بىرلەسكەن جوبالاردى جۇزەگە اسىرۋعا بولادى. ەڭ باستىسى – نيەت ءتۇزۋ، باعىت-باعدار ايقىن، كاسىپكەرلىكتى دامىتۋدا اشىقتىق بار، – دەدى اكىم.
ءوز كەزەگىندە ءسوز العان تۇرىك دەلەگاتتارىنىڭ توپ باسشىسى، «انتاليا» يندۋستريالدى ايماعىنىڭ باس ديرەكتورى يلحان مەتين شىمكەنت قالاسىندا ورنالاسقان يندۋستريالدى ايماقتاردىڭ مۇمكىندىگى زور ەكەنىن ايتىپ، بىرلەسكەن جوبالاردى جۇزەگە اسىرۋدا ينۆەستيسيا سالۋعا نيەتتى ەكەنىن جەتكىزدى.
ايتا كەتەيىك، «انتاليا» يندۋستريالدى ايماعى تۇركياداعى الەۋەتتى 5 ءىرى ايماقتىڭ ءبىرى سانالادى. ايماقتا 8 سالادا جۇمىس ىستەيتىن ەكسپورتتىق ءونىم وندىرەتىن ءىرى كومپانيالار شوعىرلانعان.
وقو اكىمىنىڭ باسپا ءسوز قىزمەتى
