وڭتۇستىك قازاقستان وبلىسىنىڭ اكىمى ج.تۇيمەبايەۆ وڭتۇستىك قازاقستان مەديسينالىق اكادەمياسىندا بولىپ، وندا ۋنيۆەرسيتەت زەرتحانالارىنىڭ جابدىقتارىمەن تانىستى.



اتاپ ايتقاندا، قىمبات مودەلدەر ورناتىلعان كلينيكالىق-سيمۋلياسيالىق وقىتۋ ءبولىمى. مۇندا ستۋدەنتتەر عانا ەمەس، سونىمەن بىرگە قالانىڭ جانە وبلىستىڭ دارىگەرلەرى ادامدارعا ۇشاقتار مەن پويىزداردا، اۆتوبۋس ايالدامالارىندا كەنەتتەن كارديوحيرۋرگيالىق جانە ينسۋلت بولعان جاعدايدا العاشقى مەديسينالىق كومەك كورسەتۋدى ۇيرەنەدى.



بۇدان بولەك، وبلىس باسشىسى جوعارعى وقۋ ورنىنىڭ پروفەسسورلىق-وقىتۋشىلىق قۇرامىمەن جانە ستۋدەنت-ماگيسترانتتارمەن كەزدەستى. كەزدەسۋ بارىسىندا اكىم قاتىسۋشىلاردىڭ نازارىن ەلىمىزدەگى مەديسينا مەن فارماسيەۆتيكا سالاسى بويىنشا كادر دايارلاۋ ساپاسىنا اۋداردى. ياعني، ول قۇرىلتايشىنىڭ وقۋ ۇدەرىسىن ودان ءارى دامىتۋعا مۇددەلى ەكەنىن جانە ايتارلىقتاي قاراجات سالۋعا دايىن ەكەنىن اتاپ ءوتتى.

– جالپى اكادەميا 1979 جىلى قۇرىلعان وزىندىك بازاسى بار ۇلكەن جوعارى وقۋ ورنى بولىپ تابىلادى. ال ەندى ءبىزدىڭ 3 ميلليون حالقى بار وبلىس ءۇشىن وسىنداي ساپالى وقۋ ورىندارى، اسىرەسە دارىگەرلىك وقۋ ورىندارى وتە قاجەت. ۇلتىنىڭ جارقىن بولاشاعىن ويلاعان مەملەكەت الدىمەن ازاماتتارىنىڭ دەنساۋلىعىنا كوڭىل بولەدى. وزدەرىڭىز بىلەسىزدەر، ەلباسى  جىل سايىنعى حالىققا ارناعان جولداۋىندا دەنساۋلىق سالاسىنا ايتارلىقتاي كوڭىل ءبولىپ كەلەدى. ەندى ءبىز اۋرۋدى بولعان كەزدەگى ەمدەۋدەن گورى، اۋرۋدى بولدىرماۋدىڭ جولدارىن قاراستىرۋىمىز قاجەت. وسى باعىتتا جۇمىس ىستەۋىمىز كەرەك، – دەدى وبلىس اكىمى. سونىمەن قاتار، ج.تۇيمەبايەۆ ۋنيۆەرسيتەتتىڭ ءبىلىم بەرۋ جانە عىلىمي قىزمەتىندەگى وڭ ناتيجەلەرىنە كوڭىلى تولعانىن جەتكىزدى.

ءوز كەزىندە وبلىستىق ءماسليحاتتىڭ دەپۋتاتى، «وقما» اق-نىڭ  قۇرىلتايشىسى  س.سەيتجانوۆ ۋنيۆەرسيتەتتىڭ العاشقى قادامدارىنا قىسقاشا توقتالىپ، قوسىمشا اۋديتورلىق قورمەن 7205 شارشى مەتر بولاتىن جاڭا عيمارات ساتىپ الىپ جاتقانىن ءمالىم ەتتى.

– بۇدان باسقا بوزارىق شاعىن اۋدانىندا 150 گەكتار جەردە جاقىن ارادا يننوۆاسيالىق ۋنيۆەرسيتەت قالاشىعى بوي كوتەرەدى. ول تەك مەديسينا فاكۋلتەتىنە عانا ەمەس، سونىمەن بىرگە مەكتەپ-بيزنەسكە دە اينالادى. وندا وقۋ عيماراتتارى، سپورتتىق نىساندار، تۇرعىن ءۇي كەشەندەرى مەن 1 مىڭ ورىندىق جاتاقحانا سالىنباق، – دەدى س.سەيتجانوۆ.



كەزدەسۋ سوڭىندا وقۋ ورنىنىڭ رەكتورى، مەديسينا عىلىمدارىنىڭ دوكتورى، پروفەسسور م.رىسبەكوۆ ۋنيۆەرسيتەت جوعارى ناتيجەلەرگە قول جەتكىزۋ جولىندا ەكەنىن ويتكەنى ينۆەستور ءبىلىم بەرۋ ۇدەرىسىن دامىتۋعا جانە ءبىلىم بەرۋ كەڭىستىگىن جەتىلدىرۋگە ىقپال ەتىپ، قولدايتىنىن ايتتى.

ايتا كەتەيىك، 2017-2018 وقۋ جىلىندا مەديسينا اكادەمياسىندا 3771 ستۋدەنت ءبىلىم السا، ونىڭ 238 شەتەلدىك جاستار. ونداعى ءبىلىم الۋشىلارعا ءۇش تىلدە 300-دەن استام پروفەسسورلىق-وقىتۋشىلىق قۇرام ساباق بەرەدى.

وقو اكىمىنىڭ باسپا ءسوز قىزمەتى