"كوبىسى تۇسىنبەدى، قولداعاندار از بولدى. ونى دا تۇسىنۋگە بولادى. ول كەزدە كەڭەس وداعى قۇلاپ، ءبىز جەكە ءوز جولىمىزبەن كەتتىك. زەينەتاقى تولەۋگە قارجى جوق. مۇعالىمدەر مەن دارىگەرلەرگە جالاقى تولەۋ قيىن بولىپ تۇرعاندا استانانى اۋىستىرۋ تۋرالى شەشىم قابىلدانىپ وتىر.
ءبىر كۇنى سارا الپىس قىزى: "ەلدىڭ ءبارى قارسى بولىپ جاتقاندا بۇنى قالاي جاساماقسىڭ؟" دەپ سۇرادى. مەن سەنى اۋىلىڭا اپارا جاتىرمىن عوي، نۇرانىڭ جاعاسىنا دەدىم (كۇلدى)"، - دەدى نازاربايەۆ "Nur-Sultan. قولتاڭبا" دەرەكتى فيلمىندە.
وسى ورايدا قازاقستاننىڭ تۇڭعىش پرەزيدەنتى استانانى اۋىستىرعاندا ەڭ ۇلكەن تاۋەكەلگە بارعانىن اتاپ ءوتتى.
"سول ۋاقىتتا ساياسي تاعدىرىمدى بايگەگە تىكتىم. وسى ۋاقىتقا دەيىن تالاي تاۋەكەلگە باردىم عوي. سول تاۋەكەلدەردىڭ ەڭ ۇلكەنى – استانانى سالۋ بولدى. ءبىراق ءبارى ورىندالدى. ينتۋيسيا دەگەن بار عوي. مەن ءوزىم سوعان سەنەمىن. اللادان تىلەپ جاتاسىڭ عوي. سول كەزدە ويىڭا ءبىر سىبىر كەلەدى"، - دەپ اتاپ ءوتتى نازاربايەۆ.
ەلباسى استانانى اۋىستىرۋعا شەشىم قابىلداعاندا كورگەن ءتۇسىن دە ەسكە الدى.
"مەن - قاراساي باتىردىڭ توعىزىنشى ۇرپاعىمىن. ءبىزدىڭ جانىمىزدا قاراسايدان قالعان قىزىل جولبارىس جۇرەدى دەيدى. بۇل جولبارىس كەيىن ءسۇيىنبايعا، ودان كەيىن جامبىل اقىنعا كورىنگەن دەيدى.
ءبىر كۇنى تۇسىمدە انام مارقۇم ەكى جولبارىستى جەتەكتەپ، ۇيگە كىرىپ كەلدى. جاڭاعى جاتقان جولبارىس باسىن كوتەرىپ، "بارلىعى دۇرىس بولادى، قورىقپا، جاسا..." دەپ قازاقشا سويلەپ كەتتى. بۇل ەل استاناسىن اۋىستىرۋدى ويلاستىرىپ جۇرگەنمەن، ءالى دە ءبىر شەشىمگە كەلە الماي الابۇرتىپ جۇرگەن ۋاقىتىم ەدى. الگى جاعداي ماعان ءبىراز كۇش-جىگەر بەردى. قازاق ىرىمشىل حالىق قوي. الگى ءتۇس ماعان ايان بەرگەندەي كورىندى، جاقسىلىققا جورىدىم"، - دەيدى نازاربايەۆ.
ءدال وسى ءتۇس ەلباسىعا كۇش بەرگەن. ونى كورگەننەن كەيىن استانانى اۋىستىرۋعا بەل بۋعان.
نازاربايەۆ استانانى سالاردىڭ الدىندا الەمنىڭ ءبىراز ەلىن ارالاپ شىققانىن ايتتى. برازيليادان باستاپ اۆسترالياعا دەيىن ساپار شەككەن.
"شىنى كەرەك كوپشىلىگىنە كوڭىلىم تولمادى. كەيىن استانانىڭ كەسكىن-كەلبەتىن قاتىستى كونكۋرس جاريالادىق. اۆستراليا، جاپونيا، باتىس ەلدەرىنەن كەلگەن تانىمال ساۋلەتشىلەر ءوز ۇلگىلەرىن ۇسىندى. 50 جوبانىڭ ىشىنەن 27ء-سىن تاڭداپ الدىق. سونىڭ ىشىندە قازىلار القاسى جاپونيانىڭ ايگىلى ارحيتەكتورى كۋراكاۆانىڭ نۇسقاسىن قابىلدادى. مۇنىڭ ءبارى ەندىگىدە تاريح.
ەلوردا ەۋروپا، شىعىس، جۇڭگو، يسپانيا، يتاليانىڭ ارحيتەكتۋراسى ۇيلەسىم تاۋىپ، كەلگەن ادامداردىڭ كوز جاۋىن الاتىن اسەم قالا بولىپ قالىپتاستى. قالا ءارى قاراي وسىپ-وركەندەيتىن بولادى، حالقى 2-3 ميلليونعا جەتەدى. ءسويتىپ، ۇلكەن قالالار قاتارىنا قوسىلادى"، – دەدى تۇڭعىش پرەزيدەنت.
ءقازىر ەلوردادا رەسپۋبليكا حالقىنىڭ 7 پايىزى تۇرادى. 1997 جىلمەن سالىستىرعاندا حالىق سانى 4 ەسەگە ارتتى. بۇگىندە قالا تۇرعىندارىنىڭ سانى – 1 ميلليون 200 مىڭ.
ەلباسى، سونىمەن بىرگە، قالا قۇرىلىسىنا قاتىستى پىكىر ءبىلدىردى.
"كوزىم تۇسكەن جەردى جوندەڭدەر دەپ ايتىپ وتىرامىن. قالا اكىمىمەن ءجيى كەزدەسەمىن. دەگەنمەن، كەيدە دۇرىس جاسالماي جاتقان كەزدە قىنجىلامىن. بۇل قالادا ساۋلەتتى عيماراتتار كوپ بولۋى كەرەك، ءار اكىم ءوزىنىڭ ءىزىن قالدىرۋى ءتيىس. ويدان شىقپايتىن ماسەلە، قازىرگى ءبىر قاباتتى ۇيلەردەن تۇراتىن قالاشىق بۇرىن قالانىڭ سىرتىندا بولاتىن، بۇگىندە ورتاسىنا كىرىگىپ كەتتى. بارلىق جەردە مۇنارالى نىساندار بولۋى ءتيىس ەمەس، ارينە، ءبىراق قالانىڭ ورتاسىندا ەلورداعا لايىقتى عيماراتتار بولۋى كەرەك"، – دەيدى تۇڭعىش پرەزيدەنت.
ايتۋىنشا، بيىل قالادا 3 ملن شارشى مەتر تۇرعىن ءۇي سالىنادى.
https://www.youtube.com/watch؟v=IsuM5s_XE64
