بۇگىن نۇر-سۇلتان قالاسىنداعى ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا تۇركىستان وبلىسىنىڭ اكىمى ءو.شوكەيەۆ ءوڭىردىڭ تۋريستىك الەۋەتى جوعارى ەكەنىنە ەرەكشە توقتالدى. سونىمەن بىرگە ول تۇركىستان وبلىسىن قۇرۋ تۋرالى ەلباسىنىڭ تاريحي شەشىمى ءوڭىردىڭ دامۋىنا تىڭ سەرپىن بەرگەنىن مالىمدەدى.

– تۇركىستان قالاسىنىڭ ءوزى – ۇلى قۇندىلىق. شاھارداعى ق.ا.ياساۋي كەسەنەسىنىڭ تاريحي، ارحيتەكتۋرالىق ءارى عىلىمي تۇرعىدا ءمانى وتە زور. تۇركىستانعا كورشىلەس ەلدەرمەن بىرگە امەريكالىقتار دا، ەۋروپالىقتار دا قىزىعۋشىلىقپەن قارايدى.

بىلتىر تۇركىستان وبلىسى قۇرىلىپ، ونىڭ ورتالىعى بولىپ تۇركىستان قالاسى بەكىتىلگەنىن بىلەسىزدەر. ەلباسىنىڭ بۇل شەشىمى وتە دۇرىس بولعانىن ساراپشىلار دا، ءبىز دە كورىپ وتىرمىز. نۇرسۇلتان ءابىش ۇلى جۋىردا ءوز سۇحباتىندا تۇركىستاندى دامىتۋ تۋرالى وي بۇرىننان بەرى كوكەيدە جۇرگەنىن ايتقان ەدى. دەمەك، بۇل – ابدەن زەرتتەلگەن ستراتەگيالىق ماڭىزى بار شەشىم دەۋگە بولادى.

تۇركىستاندى تۇركى الەمىنىڭ رۋحاني ورتالىعىنا اينالدىرۋعا تولىق مۇمكىندىك بار. مەملەكەت باسشىلىعىنىڭ، وڭىرلەردىڭ، ءىرى كومپانيالاردىڭ تىكەلەي قولداۋىنىڭ ارقاسىندا تۇركىستان ءقازىردىڭ وزىندە تۇرلەنىپ جاتىر. الداعى 2-3 جىل كولەمىندە تۇركىستان قالاسى قازاقستاننىڭ ماقتانىشىنا ءارى جاۋھارىنا اينالارىنا سەنىمدىمىن، – دەدى وبلىس اكىمى.

بۇگىندە تۇركىستانعا كەلۋشى ساياحاتشىلار سانى ارتا تۇسكەن. كيەلى ءارى تۋريستىك ورىندارعا اپاراتىن جولداردى جوندەۋ، ينفراقۇرىلىمدى جاقسارتۋ ماسەلەسى دە نازاردا تۇرعانىنا توقتالعان ءوڭىر باسشىسى تۋريزم سالاسى باسىم باعىتقا يە ەكەنىن مالىمدەدى.

سونىمەن بىرگە ءو.ەستاي ۇلى ب ا ق وكىلدەرى تاراپىنان قويىلعان بالا قۇقىعىن قورعاۋ، يندۋستريالدى ايماقتاردى دامىتۋ، اۋىل شارۋاشىلىعى، كاسىپكەرلىكتى دامىتۋ، سىبايلاس جەمقورلىققا قارسى كۇرەس، ارىس قالاسىن قالپىنا كەلتىرۋ، تۇركىستاندى كوگالداندىرۋ جانە سۋلاندىرۋ باعىتىنداعى وزەكتى سۇراقتارعا جاۋاپ بەردى.



تۇركىستان وبلىسى اكىمىنىڭ باسپا ءسوز قىزمەتى