بىرنەشە وڭىردە راديكال ءدىني يدەولوگيانى ۇستاناتىندار انىقتالدى. ولار تەراكت ۇيىمداستىرماق بولعان، - دەپ حابارلايدى Dalanews.kz.
وسى جىلعى 22 قاراشادا ۇلتتىق قاۋىپسىزدىك كوميتەتى ىىم-مەن بىرلەسە، الماتى وبلىسى پروكۋراتۋراسىنىڭ ۇيلەستىرۋىمەن الماتى، قوستاناي جانە جەتىسۋ وبلىستارىنىڭ قىلمىستىق-اتقارۋ جۇيەسى مەكەمەلەرىندە 10 راديكالدى ءدىني يدەولوگيا جاقتاسىنىڭ ارەكەتىنىڭ جولىن كەستى.
الدىن الا مالىمەتكە سايكەس، فيگۋرانتتاردىڭ ءبىرى قاماۋ جاعدايىندا تەررورلىق اكت جاساۋعا دايىندالعان، ال قالعاندارى تەرروريزمدى ناسيحاتتاۋعا قاتىسىپ، تەررورلىق ارەكەتتەردى ۇيىمداستىرۋ ماقساتىندا ادامداردى ءوز قاتارلارىنا تارتۋمەن اينالىسقان.
جازا وتەۋ ورىندارىندا جۇرگىزىلگەن تىنتۋلەر بارىسىندا سۋىق قارۋ، سمارتفوندار جانە باسقا دا زاتتاي دالەلدەر الىندى.
بىرەۋىنىڭ ەكسترەميزم ءۇشىن سوتتىلىعى بار. قالعاندارى كىسى ءولتىرۋ، توناۋ جانە ۇرلىق ءۇشىن جازالارىن وتەگەن.
سونداي-اق، الماتى قالاسىندا پروباسيالىق باقىلاۋدا تۇرعان ولاردىڭ بايلانىسى ۇستالدى.
كورسەتىلگەن ادامدارعا قاتىستى قىلمىستىق كودەكستىڭ 255، 256 جانە 259-باپتارى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. قىلمىستىق-پروسەستىك كودەكستىڭ 201-بابىنىڭ 1-بولىگىنە سايكەس وزگە اقپارات جاريا ەتۋگە جاتپايدى.
