بۇگىندە كوگالداندىرۋ جۇمىستارى توقتاۋسىز جالعاسۋدا. تۇركىستاندا جەرگىلىكتى كليماتقا تەز بەيىمدەلەتىن كوشەتتەر مەن كوپجىلدىق شوپتەر، گۇلدەر گۇلدەيتىن شوپتەردى وسىرۋگە ءمان بەرىلگەن. اتاپ ايتقاندا، شاھاردا كولەڭكە بەرەتىن ءارى تەز وسەتىن قاراعاي مەن اكاسيا اعاشتارى، ۇلكەنجاپىراقتى شەگىرشىن، ۇيەڭكى وتىرعىزىلدى.
تۇركىستان قالاسىنىڭ «جاسىل بەلدەۋىندە» جەمىس اعاشتارى دا وسىرىلۋدە. بۇل جۇمىستارعا اگرونومدار، ماماندار، كاسىپكەرلەر، قالا تۇرعىندارى اتسالىسۋدا. وسى رەتتە قالانى 32 سەكتورعا ءبولىپ، اۋدان، قالا اكىمدىكتەرى مەن باسقارمالاردى جاۋاپتى ەتىپ، جۇمىستى جۇيەلەۋ ءوز جەمىسىن بەرۋ ۇستىندە.
وبلىس اكىمى ءومىرزاق شوكەيەۆ ءار سەكتوردى ارالاپ، قالانىڭ اباتتاندىرۋ جانە كوگالداندىرۋ جۇمىستارىن تۇراقتى تۇردە تەكسەرىپ تۇرادى. بارلىق سەكتوردا جۇمىس قارقىنى جوعارى. قالا كۇن سايىن قوقىستان تازارتىلىپ، گۇلزارلار، ساياباقتار جايناي تۇسكەن.
اياقجولدار مەن ۆەلوجولدار، سۋبۇرقاقتار ەلگە قىزمەت ەتۋدە.
قالا اۋماعىنداعى جاسىل اۋماقتارعا سۋ جۇيەسى جۇرگىزىلىپ، تۇراقتى تۇردە سۋارىلىپ جاتىر. جاسىل جەلەكتەردى كۇندەلىكتى سۋارۋ ءۇشىن قالا اۋماعىنا گيدرانتتىق جۇيە جۇرگىزىلگەن. بۇگىندە 32 سەكتوردا ءۇش كەزەڭمەن جۇمىس جۇرگىزىلىپ، 1600 گەكتار جەرگە 60 مىڭنان استام كوشەت ەگىلگەن. قالادا سەنبىلىكتەر وتكىزۋ، تۇرعىنداردىڭ ەكولوگيالىق ساۋاتتىلىعىن ارتتىرۋ باعىتىنداعى ءىس-شارالار داستۇرگە اينالعان. سەكتور جۇمىسىنا جاۋاپى ازاماتتىڭ ءبىرى، وتىرار اۋدانى تالاپتى اۋىل وكرۋگى اكىمى اپپاراتىنىڭ قىزمەتكەرى داۋرەن پارتايەۆ تۇركىستاندى تۇلەتۋگە ۇلەس قوسىپ جۇرگەنىنە قۋانىشتى.
– تۇركىستان وبلىسى اكىمى ءومىرزاق ەستاي ۇلىنىڭ تاپسىرماسى بويىنشا، وتىرار اۋدانى اكىمدىگى جاۋاپتى سەكتورداعى قۇلىنشاق اقىن كوشەسىنىڭ تازالىق، كورىكتەندىرۋ، كوگالداندىرۋ جۇمىستارىمەن اينالاسىپ جاتىرمىز. كەرەمەت وزگەرىستەردى كوردىك. قالانىڭ بولاشاعى جارقىن، – دەيدى وتانشىل ازامات.
«جاسىل بەلدەۋگە» تاعى دا بارىپ، باقىلاۋدان وتكىزگەن ءومىرزاق ەستاي ۇلى ەگىلگەن كوشەتتەردىڭ ۋاقتىلى سۋعارىلۋىنا اسا ءمان بەرىلۋى كەرەكتىگىن، سوندا عانا ءىس ناتيجە بەرەتىنىن ايتتى. ۇرپاق ءۇشىن پايدالى بۇل باستاما ۇزدىكسىز جۇزەگە اسىرىلا بەرەتىنىن جەتكىزىپ، ازاماتتارعا جۇمىستى جاناشىرلىقپەن، سەرگەكتىكپەن اتقارۋدى تاپسىردى.
شاھارداعى جاعىمدى وزگەرىستەردى تۇركىستان قالاسىنىڭ تۇرعىنى ءاشىم الدابەرگەنوۆ جوعارى باعالايدى.
«بۇرىنعىعا قاراعاندا بۇل جەردە كوپ وزگەرىس بولىپ جاتىر. كوگالداندىرۋ، تازالىق، اباتتاندىرۋ جۇمىستارى وتە جاقسى. وبلىس بولعالى وسىنداي جاقسىلىقتارعا كۋا بولۋدامىز. بۇرىن بۇل «جاسىل بەلدەۋ» مەن جاڭا شاعىناۋداننىڭ ورنى دالا-تۇعىن. دالانى كوركەيتىپ، جاعداي جاساپ جاتقان ۇكىمەتكە راحمەت»، – دەيدى تۇرعىن.
تۇركىستاننىڭ تۋماسى، قالا پاريوتى بايان بۇلدىرىقوۆا:
– ءقازىر تۋريستەر دە كوپ كەلىپ جاتىر. ونىڭ ءبارى ادامدى قۋانتادى. مەملەكەت باسشىلىعىنا، اكىمشىلىككە ريزاشىلىعىمدى بىلدىرەمىن. ءقازىر قالادا مادەنيەت جوعارىلاپ كەلەدى. كوگالداندىرۋ، اباتتاندىرۋ جۇمىستارى ارقىلى تۇركىستاننىڭ ەكولوگياسى جاقسارا تۇسەتىنىنە سەنىمدىمىن، – دەيدى.
ايتا كەتەيىك، بيىل ق ر ۇكىمەتى تۇركىستان وبلىسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان كەشەندى جوسپارىن ماقۇلدادى. تۇركىستان قالاسىن دامىتۋدىڭ 1-كەزەڭى اياقتالىپ، نەگىزگى الەۋمەتتىك ينفراقۇرىلىمى قالاندى. 123 نىساننىڭ قۇرىلىسى اياقتالدى. تۇركىستان قالاسىن دامىتۋدىڭ ءىى كەزەڭى اياسىندا 109 جوبا ىسكە اسىرىلادى. بۇل ماقساتقا 1،3 ترلن تەڭگە ينۆەستيسيا باعىتتالادى. بۇل قولداۋ مەن جوسپارلار تۇركىستاندى ورتا ازياداعى ەڭ كورىكتى شاھارلاردىڭ بىرىنە اينالدىرۋعا سەرپىن بەرەتىنى ءسوزسىز.
اسىرەسە، اباتتاندىرۋ، كوگالداندىرۋ جۇمىستارى قارقىندى. جان جادىراتار جاڭالىقتار مەن كوز قۋانتاتىن وزگەرىستەردى ەل ءقازىردىڭ وزىندە سەزىپ-بىلىپ وتىر. تۇركىستاندى دامىتۋ باعىتىنداعى جۇمىستار جالعاسا بەرەدى.
