Búginde kógaldandyrý jumystary toqtaýsyz jalǵasýda. Túrkistanda jergilikti klimatqa tez beiimdeletin kóshetter men kópjyldyq shópter, gúlder gúldeitin shópterdi ósirýge mán berilgen. Atap aitqanda, shaharda kóleńke beretin ári tez ósetin qaraǵai men akatsiia aǵashtary, úlkenjapyraqty shegirshin, úieńki otyrǵyzyldy.
Túrkistan qalasynyń «Jasyl beldeýinde» jemis aǵashtary da ósirilýde. Bul jumystarǵa agronomdar, mamandar, kásipkerler, qala turǵyndary atsalysýda. Osy rette qalany 32 sektorǵa bólip, aýdan, qala ákimdikteri men basqarmalardy jaýapty etip, jumysty júieleý óz jemisin berý ústinde.
Aiaqjoldar men velojoldar, sýburqaqtar elge qyzmet etýde.
Qala aýmaǵyndaǵy jasyl aýmaqtarǵa sý júiesi júrgizilip, turaqty túrde sýarylyp jatyr. Jasyl jelekterdi kúndelikti sýarý úshin qala aýmaǵyna gidranttyq júie júrgizilgen. Búginde 32 sektorda úsh kezeńmen jumys júrgizilip, 1600 gektar jerge 60 myńnan astam kóshet egilgen. Qalada senbilikter ótkizý, turǵyndardyń ekologiialyq saýattylyǵyn arttyrý baǵytyndaǵy is-sharalar dástúrge ainalǵan. Sektor jumysyna jaýapy azamattyń biri, Otyrar aýdany Talapty aýyl okrýgi ákimi apparatynyń qyzmetkeri Dáýren Partaev Túrkistandy túletýge úles qosyp júrgenine qýanyshty.
– Túrkistan oblysy ákimi Ómirzaq Estaiulynyń tapsyrmasy boiynsha, Otyrar aýdany ákimdigi jaýapty sektordaǵy Qulynshaq aqyn kóshesiniń tazalyq, kóriktendirý, kógaldandyrý jumystarymen ainalasyp jatyrmyz. Keremet ózgeristerdi kórdik. Qalanyń bolashaǵy jarqyn, – deidi otanshyl azamat.
«Jasyl beldeýge» taǵy da baryp, baqylaýdan ótkizgen Ómirzaq Estaiuly egilgen kóshetterdiń ýaqtyly sýǵarylýyna asa mán berilýi kerektigin, sonda ǵana is nátije beretinin aitty. Urpaq úshin paidaly bul bastama úzdiksiz júzege asyryla beretinin jetkizip, azamattarǵa jumysty janashyrlyqpen, sergektikpen atqarýdy tapsyrdy.
Shahardaǵy jaǵymdy ózgeristerdi Túrkistan qalasynyń turǵyny Áshim Aldabergenov joǵary baǵalaidy.
«Burynǵyǵa qaraǵanda bul jerde kóp ózgeris bolyp jatyr. Kógaldandyrý, tazalyq, abattandyrý jumystary óte jaqsy. Oblys bolǵaly osyndai jaqsylyqtarǵa kýá bolýdamyz. Buryn bul «Jasyl beldeý» men jańa shaǵynaýdannyń orny dala-tuǵyn. Dalany kórkeitip, jaǵdai jasap jatqan úkimetke rahmet», – deidi turǵyn.
Túrkistannyń týmasy, qala parioty Baian Buldyryqova:
– Qazir týrister de kóp kelip jatyr. Onyń bári adamdy qýantady. Memleket basshylyǵyna, ákimshilikke rizashylyǵymdy bildiremin. Qazir qalada mádeniet joǵarylap keledi. Kógaldandyrý, abattandyrý jumystary arqyly Túrkistannyń ekologiiasy jaqsara túsetinine senimdimin, – deidi.
Aita keteiik, biyl QR Úkimeti Túrkistan oblysyn áleýmettik-ekonomikalyq damytýdyń 2021-2025 jyldarǵa arnalǵan keshendi josparyn maquldady. Túrkistan qalasyn damytýdyń 1-kezeńi aiaqtalyp, negizgi áleýmettik infraqurylymy qalandy. 123 nysannyń qurylysy aiaqtaldy. Túrkistan qalasyn damytýdyń II kezeńi aiasynda 109 joba iske asyrylady. Bul maqsatqa 1,3 trln teńge investitsiia baǵyttalady. Bul qoldaý men josparlar Túrkistandy Orta Aziiadaǵy eń kórikti shaharlardyń birine ainaldyrýǵa serpin beretini sózsiz.
Ásirese, abattandyrý, kógaldandyrý jumystary qarqyndy. Jan jadyratar jańalyqtar men kóz qýantatyn ózgeristerdi el qazirdiń ózinde sezip-bilip otyr. Túrkistandy damytý baǵytyndaǵy jumystar jalǵasa beredi.
