وبلىستاعى تەمىر جول ستانسياسى قويمالارىنداعى 1 توننا كومىردىڭ باعاسى بويىنشا «شۇباركول» كومىرى – 14-15 مىڭ تەڭگە، «بوتاقارا» كومىرى – 10-11 مىڭ تەڭگە كولەمىندە. بۇگىن بۇل تۋرالى تۇركىستان وبلىستىق وڭىرلىك كوممۋنيكاسيالار قىزمەتىندە وتكەن بريفينگتە ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى مارعۇلان مارايىم ءمالىم ەتتى.
ونىڭ ايتۋىنشا، وبلىستاعى 2830 بيۋدجەتتىك مەكەمەنىڭ بارلىعى، ياعني 100 پايىزى قىسقى ماۋسىمعا دايىن. ونىڭ ىشىندە ءبىلىم سالاسىندا – 1289، دەنساۋلىق ساقتاۋ سالاسىندا – 788، الەۋمەتتىك سالادا – 753 مەكەمە.
– وبلىس بويىنشا جەكە تۇرعىنداردىڭ الداعى كۇزگى-قىسقى كەزەڭدەگى كومىر وتىنىنا دەگەن جالپى قاجەتتىلىگى – 902 مىڭ توننا، بۇگىنگى كۇنگە تەمىر جول ستانسيالارىنداعى قويمالارعا تاسىمالدانعانى – 689،1 مىڭ توننا. وبلىستاعى ورتالىقتاندىرىلعان جىلۋمەن قامتاماسىز ەتىلەتىن كوپقاباتتى تۇرعىن ۇيلەردىڭ سانى – 544، ولار جىلۋ بەرۋ ماۋسىمىنا تولىق دايىن. دەربەس قازاندىقتاردىڭ (كوتەلنايا) سانى – 10، بارلىعى قىسقى ماۋسىمعا دايار. وبلىستىڭ جىلۋ بەرۋ دايىندىعىنا اپتا سايىن تۇراقتى مونيتورينگ جۇرگىزىلۋدە، – دەدى مارعۇلان زۇلحارناي ۇلى.
بۇدان بولەك، مازۋت وتىنىنا دەگەن وبلىس بويىنشا قاجەتتىلىك كولەمى 10 مىڭ توننا بولسا، ەنەرگەتيكا مينيسترلىگىمەن تاسىمالداۋ كەستەسى بەكىتىلىپ، كەلىسىم-شارت جاسالعان.
ايتا كەتەرلىگى، وبلىستىڭ سولتۇستىك جانە تاۋلى ايماقتارىندا اتاپ ايتقاندا، سوزاق، تولەبي، تۇلكىباس اۋداندارىندا 15 قازاننان باستاپ جىلۋ بەرىلىپ وتىر.
تۇركىستان وبلىسى بويىنشا تابيعي مونوپوليا سۋبەكتىلەرىنىڭ كوممۋنالدىق قىزمەتتەرى ءۇشىن 2018 جىلدىڭ 1 قازانداعى بەرەشەگى – 499،2 ملن. تەڭگەنى قۇراعان. بەرەشەكتىڭ نەگىزگى بولىگى جەكە تۇرعىندار پايدالانعان تابيعي گازعا قاتىستى.
