ق.ا.ياساۋي كەسەنەسى ماڭىنان ەلەكتروكارمەن باستالعان شەرۋ “كەرۋەن ساراي” ويىن-ساۋىق ورتالىعىنا دەيىنگى باعىتتى قامتىدى. جاستار مەملەكەتتىك ءرامىزىمىز تۋدى كوتەرىپ، قالا تۇرعىندارى مەن قوناقتارىنا پاتريوتتىق رۋح سىيلادى. جۇزدەرىنە قۋانىش ۇيالاعان ازاماتتار ۇيالى تەلەفوندارىنا اسەم كورىنىستى تاسپالاپ، جاستاردىڭ باستاماسىنا ءوز ريزاشىلىقتارىن جەتكىزدى.
مۇنان ءارى قالانىڭ باس كوشەسى ب.ساتتارحانوۆتىڭ بويىمەن اكىمشىلىك-ىسكەرلىك ورتالىعى ارالىعىندا اۆتوشەرۋ ۇيىمداستىرىلدى. جالپى 50-گە جۋىق بەلسەندى جاستىڭ باسىن بىرىكتىرگەن شارانىڭ ۇيىمداستىرۋشىسى اكسيانىڭ ماقساتىمەن ءبولىستى.
– تۇركىستاندىق جاستار قايتا جاڭعىرعان مەرەكەنى ناسيحاتتاۋعا ۇلەس قوسۋدى شەشتىك. رەسپۋبليكا كۇنى – وتانشىلدىققا جانە ەگەمەندىگىمىزدىڭ ءقادىرىن ۇعىنۋعا شاقىراتىن مەرەكەلەردىڭ قاتارىنا ەندى. ءبىز بۇل مەرەكەنىڭ ماڭىزىن، سالماعىن جانە جاۋاپكەرشىلىگىن شىنايى سەزىنەمىز. اكسياعا بەلسەندى جاستاردان بولەك، قالانىڭ ازاماتتارى دا قاتىسقانى قۋانتتى. قازاق ەلىن رەسپۋبليكا كۇنى مەرەكەسىمەن شىن جۇرەكتەن قۇتتىقتايمىز! كوك بايراعىمىز ماڭگى جەلبىرەسىن! – دەدى «Jastar ruhy» جق تۇركىستان وبلىستىق فيليالىنىڭ ءتوراعاسى جانسەرىك جۇمان.
