جيىنعا وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ، وبلىس اكىمى اپپاراتى قوعامدىق-ساياسي سالا مونيتورينگى ءبولىمىنىڭ باسشىسى سامات راسۋل، وبلىستىق قوعامدىق دامۋ باسقارماسى باسشىسىنىڭ مىندەتىن اتقارۋشى داۋرەن سارييەۆ جانە ونلاين رەجيمدە زيالى قاۋىم وكىلدەرى، اۋداندىق، قالالىق ارداگەرلەر ۇيىمدارى مەن اكەلەر مەكتەبىنىڭ ءتوراعالارى، اجەلەر القاسىنىڭ ءتورايىمدارى، اۋدان، قالا اكىمدەرىنىڭ ورىنباسارلارى مەن ىشكى ساياسات ءبولىمىنىڭ باسشىلارى قاتىستى.
جيىندى اشىپ، جۇرگىزىپ وتىرعان وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ شارانىڭ كۇن ءتارتىبىن بايانداپ، جولداۋداعى ماڭىزدى ماسەلەلەر مەن ايقىن ەرەكشەلىكتەردى اتاپ ءوتتى.
– جولداۋ ەلدىڭ ىشكى جانە سىرتقى جاعدايلارىنا بايلانىستى پرەزيدەنتتىڭ توپتاسۋداعى ءتيىمدى شاراسى. جولداۋ ارقىلى ءاربىر ازامات ەلدىڭ دامۋ باعىتتارى مەن مۇمكىندىكتەرىمەن تانىسا وتىرىپ، بولاشاقتاعى جۇمىستارىنا وسى قۇجاتتى نەگىزگى باعدارشام ەتەدى. بىزدىڭشە، بيىلعى جولداۋدىڭ بۇرىنعىلارمەن سالىستىرمالى تۇردە بىرنەشە ەرەكشەلىگى بار ەكەنىن ايتا كەتكەن ءجون. ءبىز ءوز كەزەگىمىزدە جولداۋدىڭ جۇزەگە اسۋىنا ۇلەستەرىمىزدى قوسا الاتىنىمىزعا بەك سەنىمدىمىن. بۇل ورايدا اعا بۋىن ارداگەرلەر قاي كەزەڭدە دە قوعام مەن مەملەكەت الدىندا تۇرعان مىندەتتەردى اقىلمەن، سابىرمەن، عىلىمي ناقتىلىقپەن اتقارۋعا مۇرىندىق بولاتىن قوعامنىڭ زيالى قاۋىمىمەن بىرلەسە جۇمىستار اتقارۋعا قاشان دا دايىن، – دەدى جەڭىسبەك ماۋلەنقۇلوۆ.
سونىمەن قاتار، جيىندا جازۋشى، «الاش» سىيلىعىنىڭ يەگەرى، وبلىستىق ارداگەرلەر كەڭەسىنىڭ پلەنۋم مۇشەسى مارحابات بايعۇت، القا مۇشەسى، وبلىستىق ارداگەرلەر كەڭەسى ءتوراعاسىنىڭ ءبىرىنشى ورىنباسارى ابدىشۇكىر ساپاربەكوۆ، سارىاعاش اۋداندىق ارداگەرلەر كەڭەسىنىڭ ءتوراعاسى مۇستاپا سۇلەيمەنوۆ، قازىعۇرت اۋداندىق اجەلەر ءتورايىمى باعيلا يسمايل، شاردارا اۋداندىق ارداگەرلەر كەڭەسىنىڭ ءتوراعاسى توقسانباي بەردىبەكوۆتەر ءسوز الىپ، جولداۋ اياسىنداعى اتقارىلار جۇمىستارعا ءوز ۇسىنىستارىن ايتىپ، پىكىرلەرىن ورتاعا سالدى.
جيىن سوڭىندا جەڭىسبەك ماۋلەنقۇلوۆ پرەزيدەنت جولداۋىنا قاتىستى ارنايى قاۋلىمەن تانىستىرىپ، القا مۇشەلەرى تاراپىنان ءبىراۋىزدان ماقۇلدانىپ، بەكىتىلدى.
