جاڭادان بوي كوتەرگەن «وتىرار» شاعىن اۋدانىنداعى قونىس تويعا وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ قاتىسىپ، تۇرعىندارعا پاتەر كىلتىن تابىس ەتتى.
– ەلباسىنىڭ تاپسىرماسىمەن بۇگىندە ەلىمىزدىڭ ءاربىر ايماعىندا ءتۇرلى باعدارلامالار اياسىندا تۇرعىن ۇيلەر سالىنىپ جاتىر. بۇگىن مىنە مەملەكەت باسشىسىنىڭ كورەگەندى ساياساتىنىڭ ناتيجەسىن كورىپ، ونىڭ كۋاسى بولىپ وتىرسىزدار. كوپ جىلدار بويى كەزەك كۇتكەن وتباسىلار بۇگىن ءبىر-بىر شاڭىراققا يە بولدى. ءبىر كۇندە 480 پاتەردىڭ بەرىلۋى ول ءبىر تۇركىستان ەمەس، وبلىسىمىز ءۇشىن ۇلكەن وقيعا دەپ ايتۋعا بولادى. ەندى مۇندا جاڭادان 480 وتباسى، ياعني، ءۇش مىڭداي ازامات ءومىر سۇرەتىن بولادى. جاڭا قونىستارىڭىز قۇتتى بولسىن دەي وتىرىپ، ءاربىر شاڭىراققا بىرلىك پەن بەرەكە تىلەيمىن، – دەدى ايماق باسشىسى.
ايتا كەتەيىك، 2016 جىلى اتالعان شاعىن اۋداندا 120 پاتەردى قۇرايتىن 2 ءۇي جانە قيك ەسەبىنەن 144 پاتەر پايدالانۋعا بەرىلگەن بولاتىن. بۇگىن جالپى سانى 480 پاتەردى قۇرايتىن كوپقاباتتى سەگىز ءۇي «وڭىرلەردى دامىتۋ» باعدارلاماسى اياسىندا وبلىس بيۋدجەتىنەن بولىنگەن 3 ملرد. 109 ملن. تەڭگە قارجىعا سالىنعان. مۇندا قونىستانعان وتباسىلاردىڭ بالالارى ءۇشىن قازىرگى كۇندە بالاباقشا، مەكتەپ ماسەلەسىن شەشۋ قاراستىرىلىپ وتىر. ول ءۇشىن جەرگىلىكتى بيلىك مەملەكەتتىك جەكەمەنشىك ارىپتەستىك اياسىندا 280 ورىندىق بالاباقشا عيماراتىنىڭ قۇرىلىسىن باستاماق. ال كەلەر جىلى وسىندا 900 ورىندىق جاڭا مەكتەپ عيماراتىنىڭ قۇرىلىسى جۇرگىزىلەتىن بولادى. بۇل قۇرىلىستاردان باسقا جاڭا اۋداندا 200 ورىندىق بالالارعا ارنالعان پسيحولوگيالىق-تۇزەتۋ ورتالىعى سالىنۋدا.
سونىمەن بىرگە، قالاداعى 5 مىڭعا جۋىق ازاماتتاردىڭ تۇرعىن ۇيگە دەگەن سۇرانىسىن قاناعاتتاندىرۋ ماقساتىندا «وتىرار» شاعىن اۋدانىنان «قازاقستان يپوتەكالىق كومپانياسى» ارقىلى تاعى دا 6 ءۇيدىڭ قۇرىلىسى جۇرگىزىلمەك. كەلەر جىلى جوسپارلانعان 20 كوپقاباتتى تۇرعىن ءۇي سالىنسا، ودان بولەك 150 كوتتەدج بوي تۇزەيدى. ايتا كەتەرلىگى، قالانىڭ اكىمشىلىك ىسكەرلىك ورتالىعى دا وسى شىعىس بولىكتەن بوي تۇزەيتىن بولادى.
وقو اكىمىنىڭ باسپا ءسوز قىزمەتى
