Jańadan boı kótergen «Otyrar» shaǵyn aýdanyndaǵy qonys toıǵa Ońtústik Qazaqstan oblysynyń ákimi Janseıit Túımebaev qatysyp, turǵyndarǵa páter kiltin tabys etti.
– Elbasynyń tapsyrmasymen búginde elimizdiń árbir aımaǵynda túrli baǵdarlamalar aıasynda turǵyn úıler salynyp jatyr. Búgin mine Memleket basshysynyń kóregendi saıasatynyń nátıjesin kórip, onyń kýási bolyp otyrsyzdar. Kóp jyldar boıy kezek kútken otbasylar búgin bir-bir shańyraqqa ıe boldy. Bir kúnde 480 páterdiń berilýi ol bir Túrkistan emes, oblysymyz úshin úlken oqıǵa dep aıtýǵa bolady. Endi munda jańadan 480 otbasy, ıaǵnı, úsh myńdaı azamat ómir súretin bolady. Jańa qonystaryńyz qutty bolsyn deı otyryp, árbir shańyraqqa birlik pen bereke tileımin, – dedi aımaq basshysy.
Aıta keteıik, 2016 jyly atalǵan shaǵyn aýdanda 120 páterdi quraıtyn 2 úı jáne QIK esebinen 144 páter paıdalanýǵa berilgen bolatyn. Búgin jalpy sany 480 páterdi quraıtyn kópqabatty segiz úı «Óńirlerdi damytý» baǵdarlamasy aıasynda oblys búdjetinen bólingen 3 mlrd. 109 mln. teńge qarjyǵa salynǵan. Munda qonystanǵan otbasylardyń balalary úshin qazirgi kúnde balabaqsha, mektep máselesin sheshý qarastyrylyp otyr. Ol úshin jergilikti bılik memlekettik jekemenshik áriptestik aıasynda 280 oryndyq balabaqsha ǵımaratynyń qurylysyn bastamaq. Al keler jyly osynda 900 oryndyq jańa mektep ǵımaratynyń qurylysy júrgiziletin bolady. Bul qurylystardan basqa jańa aýdanda 200 oryndyq balalarǵa arnalǵan psıhologıalyq-túzetý ortalyǵy salynýda.
Sonymen birge, qaladaǵy 5 myńǵa jýyq azamattardyń turǵyn úıge degen suranysyn qanaǵattandyrý maqsatynda «Otyrar» shaǵyn aýdanynan «Qazaqstan ıpotekalyq kompanıasy» arqyly taǵy da 6 úıdiń qurylysy júrgizilmek. Keler jyly josparlanǵan 20 kópqabatty turǵyn úı salynsa, odan bólek 150 kotej boı túzeıdi. Aıta keterligi, qalanyń ákimshilik iskerlik ortalyǵy da osy shyǵys bólikten boı túzeıtin bolady.
OQO ákiminiń baspasóz qyzmeti
