جوبالاردىڭ ماڭىزى وتە زور. تۇركىستان وبلىسىن الەۋمەتتىك-ەكونوميكالىق دامىتۋدىڭ كەشەندى جوسپارى اياسىندا ماڭىزدى سۋ نىساندارىنىڭ قۇرىلىس-جوندەۋ جۇمىستارى اياقتالعان سوڭ تۇركىستان قالاسىنا 250 ملن تەكشە مەتر اعىن سۋ كەلىپ، بۇل ماسەلە تولىق شەشىلەدى.
ونىڭ ءبىرىنشىسى – «تۇركىستان» ماگيسترالدى كانالىن جوندەۋ جۇمىستارى جالعاسۋدا. 145 شاقىرىمدىق كانالدىڭ فيلتراسيالىق شىعىنى كوپ 60 شاقىرىمىن بەتونداۋ جۇمىسى جوسپارلانىپ، 50 شاقىرىمى بەتوندالىپ ۇلگەردى. قالعان 10 شاقىرىمى ناۋرىز ايىندا اياقتالادى. وسى ارقىلى 60 ملن تەكشە مەتر سۋ جينالىپ، ايماقتى كوگالداندىرۋعا قولدانىلماق. سونىمەن بىرگە اعىن سۋدى پايدالانۋ اۆتوماتتاندىرىلىپ، سۋدى ۇنەمدەۋگە ءمان بەرىلەدى.
وڭىردە قولعا الىنعان ەكىنشى جوبا – «كەڭساي-قوسقورعان» سۋ قويماسى. ونىڭ سىيىمدىلىعى 18 ملن تەكشە مەتردەن اسادى.
بۇرىن جاڭبىر مەن قار سۋى دالاعا كەتەتىن، ەندى سول سۋ كوزى جينالىپ، تۇركىستان قالاسى ماڭىنداعى ازىق-تۇلىك بەلدەۋى مەن جاسىل القاپقا جىبەرىلمەك. ساياباقتار دا سۋمەن قامتىلادى.
وبلىستا «جەتىكول» كولدەر جۇيەسى دە جاڭعىرتىلىپ جاتىر. جۇمىستار ناتيجەسىندە كولدىڭ سۋى قورى ۇلعايىپ، ەكولوگياسى جاقساردى. وتىرار اۋدانى مەن ارىس قالاسىنىڭ ەكوجۇيەسى جاقسارا تۇسەدى. بۇل – وزىندىك ەرەكشەلىگى بار جوبا. ويتكەنى، جىل سايىن كولدىڭ جاعاسى تارىلىپ، ەكولوگيالىق ءقاۋىپ تۋىپ ەدى. بىلتىر قالپىنا كەلتىرىپ، 34 شاقىرىم ۇزىندىققا بوگەت جاسالىنىپ، 261 ملن. تەكشە مەتر سۋ كولگە تاستالىنعان.
تۇركىستاندا «تۇركىستان» تۋريستىك-رەكرەاسيالىق ورتالىعى جاساندى كولىنىڭ دە قۇرىلىسى ءجۇرىپ جاتىر. مۇندا جەر جۇمىستارى 100% اياقتالعان. سۋ كەلەتىن، سۋ جىبەرەتىن كانالدارى دايىن. №1، №2، №3 دامبالارى تۇرعىزىلعان. بۇگىنگى تاڭدا №1-3 سۋ كەلەتىن كانالداردىڭ جەر جۇمىستارى اياقتالىپ، بەتون قۇيۋ جۇمىستارى جۇرگىزىلۋدە.
ءومىرزاق شوكەيەۆ سۋارمالى جەر كولەمىن ارتتىرۋ، سۋدى ۇنەمدەۋ جانە ايماقتى جاسىل القاپقا اينالدىرۋ باعىتىنداعى ىزدەنىستەر مەن جۇمىستار جالعاساتىنىن ايتىپ، مەردىگەرلەرگە ءوز جوبالارىن ساپالى ءارى ۋاقتىلى اياقتاۋدى تاپسىردى. وسى جوبالار ارقىلى اۋىل شارۋاشىلىعى مەن تۋريزم داميدى جانە تۇركىستان جاسىل قالاعا اينالىپ، ەكولوگياسى جاقسارادى.
