تۇركىستان وبلىسىندا «تازا قازاقستان» باعدارلاماسى بىرنەشە باعىتتا جۇرگىزىلىپ جاتىر. بۇل تۋرالى تۇركىستان وبلىسى اكىمى اپپاراتىنىڭ ماجىلىسىندە تالقىلاندى. ءوڭىر باسشىسى دارحان ساتىبالدى تازالىق، اباتتاندىرۋ جۇمىستارىن جۇيەلى اتقارۋدى تاپسىردى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– «تازا قازاقستان» باعدارلاماسى تۇراقتى قاداعالاۋدا تۇر. ءتيىستى مىندەتتەر جۇكتەلگەن. جاۋاپتى باسقارمالار مەن اۋدان، قالا اكىمدىكتەرى جۇمىس قارقىنىن باسەڭدەتپەۋى كەرەك. ەلدى مەكەندەردە تازالىقتى ساقتاۋ، ەكولوگيالىق ساۋاتتىلىقتى كوتەرۋ، ءتۇسىندىرۋ جۇمىستارى جالعاسا بەرەدى. بارلىق قۇرىلىم وسى ىسكە اتسالىسۋى ءتيىس، – دەدى دارحان ساتىبالدى.
تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆتىڭ ايتۋىنشا، «تازا قازاقستان» باعدارلاماسى اياسىندا جىل سوڭىنا دەيىن 807 سەنبىلىك وتكىزۋ جوسپارلانىپ، 20 ماۋسىم - 22 قاراشا ارالىعىندا 768 سەنبىلىك ۇيىمداستىرىلعان. 18 قاراشا-22 قاراشا ارالىعىندا 45 سەنبىلىك وتكىزىلگەن.
«تازا قازاقستان» باعدارلاماسى اياسىندا وتكەن اپتادا شاردارا، قازىعۇرت ەلدى مەكەندەردىڭ سانيتارلىق تازالىعىنىڭ جاي-كۇيىنە مونيتورينگ جۇمىستارى جۇرگىزىلىپ، ستيحيالى قوقىس ۇيىندىلەرى انىقتالىپ، ولاردى تەز ارادا جويۋ ماقساتىندا اۋىل اكىمدىگىمەن بىرلەسىپ، ارنايى تەحنيكالار مەن قۇرالدار تارتىلعان.
وڭىردەگى اۋىلدى ايماقتاردىڭ ەكونوميكاسىن وركەندەتىپ، تۇرعىندار ءۇشiن قولايلى ءومىر سۇرۋ ورتاسىن قالىپتاستىرۋ ماقساتىندا وبلىس اكىمىنىڭ باستاماسىمەن «ۇلگىلى اۋىل» بايقاۋى ءوتىپ، جەڭىمپاز انىقتالعان. باس جۇلدە يەگەرىنە، ياعني قازىعۇرت اۋدانىنداعى شاربۇلاق اۋىلى ءۇشىن قاجەتتى الەۋمەتتىك نىسان انىقتالىپ، 2025 جىلعا اتالعان نىساننىڭ قۇرىلىسى ءۇشىن وبلىستىق بيۋدجەتتەن ءتيىستى قاراجات ءبولۋ جوسپارلانۋدا.
تۇركىستانداعى يندۋستريالدى ايماقتى جيناپ، رەتكە كەلتىرۋ جۇمىستارى جۇرگىزىلدى. مەردىگەر مەكەمەگە، جاۋاپتى باسقارمالار جانە قالا اكىمدىگىنە بەكىتىلگەن سەكتورلاردىڭ 70 گەكتارى اۋماعىندا رەتسىز وسكەن وسىمدىكتەردى تازالاۋ، رەتتەۋ، ايماقتى جارىقتاندىرۋ، تازالىق جۇمىستارى اتقارىلعان. وبلىس اكىم اپپاراتىنىڭ قىزمەتكەرلەرى انىقتاعان 170 قوقىس ورنىنىڭ 164ء-ى رەتكە كەلتىرىلىپ، قالعان 6 ورىندا تازالاۋ جۇمىستارى جۇرگىزىلۋدە.
