شارادا كوكساراي سۋ رەتتەگىشى مەن بوگەن سۋ قويماسىنىڭ جۇمىسىمەن جانە شارۋا قوجالىقتارىنىڭ سۋارمالى جەردى ءتيىمدى پايدالانۋ اياسىندا ءوسىرىپ وتىرعان باۋ-باقشالارى تانىستىرىلدى. سونداي-اق، سۋارمالى جەردى ۇلعايتۋ جوبالارى مەن جەردى ءتيىمدى پايدالانۋدىڭ وزەكتى ماسەلەلەرى تالقىلاندى.
كوشپەلى وتىرىس 2 كۇنگە جوسپارلاندى. ءبىرىنشى كۇنى سۋ نىساندارىنىڭ جۇمىسىمەن جانە سۋارمالى جەردى ءتيىمدى پايدالانىپ وتىرعان شارۋا قوجالىقتارىمەن تانىسسا، ال ەكىنشى كۇنى 100-دەن اسا اۋىل شارۋاشىلىعى قىزمەتكەرلەرى مەن تاۋار وندىرۋشىلەرى قاتىسۋمەن وتىرىس ءوتتى.
جيىندا تۇركىستان ايماعىنداعى 63،3 مىڭ گا سۋارمالى جەردى سۋمەن قامتاماسىز ەتەتىن جالعىز سۋ نىسانى «بوگەن» سۋ قويماسى ارقىلى جەتكىزىلەتىن، ۇزىندىعى 145 شاقىرىم قۇرايتىن تۇركىستان ماگيسترالدى كانالدىڭ جاعدايى قارالدى.
سونىمەن قاتار، تۇركىستان ماگيسترالدى كانالىن تولىعىمەن اعىن سۋمەن قامتاماسىز ەتۋ ءۇشىن، سىرداريا وزەنىنەن سۋ وتكىزۋ قابىلەتى 20م3/سەك، 3 كوتەرمەلى ناسوس ستانسياسى، ۇزىندىعى 53،2 شق (و.ءى. 20،7 شق – جەر ارىق، 17 شق – ترۋبا،15،5 شق بەتوندى) بولاتىن ماشينالىق كانال سالۋ ناتيجەسىندە، قوسىمشا 80 ملن. م3 اعىن سۋ جەتكىزىلەدى.
بۇدان باسقا، سىيىمدىلىعى 16 ملن.تەكشە مەتر قۇرايتىن «كەڭساي-قوسقورعان 2» سۋ قويماسىن سالۋ ۇسىنىلدى. سونىمەن قوسا، كەنتاۋ قالاسىنىڭ ايماعىندا ۇزىندىعى 54،8 شاقىرىم بولاتىن تۇركىستان ماگيسترالدى كانالدىڭ بولىگىن بەتونمەن قاپتاۋ جۇمىستارىن جۇرگىزۋ ارقىلى 60 ملن. م3 فيلتراسيالىق اعىن سۋدى ۇنەمدەۋ كۇتىلۋدە.
ايتا كەتەيىك، تۇركىستان قالاسىن سۋمەن قامتاماسىز ەتۋدە جەر بەتى سۋلارىمەن قاتار، جەر استى سۋلارىنىڭ ماڭىزى زور. قازىرگى تاڭدا، جارامسىز بولىپ قالعان 145 دانا تىك ۇڭعىمالاردى قايتا قالپىنا كەلتىرۋ ارقىلى 34،7 ملن. م3 اعىن سۋمەن قامتاماسىز ەتۋگە مۇمكىندىك بەرىلمەك. ناتيجەسىندە، جىلىنا قوسىمشا 3755،0 ملن. تەڭگەنىڭ اۋىل شارۋاشىلىعى ونىمدەرى ءوندىرىلىپ، 1500 جاڭا جۇمىس ورنى اشىلادى. 189،7 ملن. م3 اعىن سۋ تاپشىلىعىن شەشۋگە قول جەتكىزىلەدى.
تۇركىستان وبلىسى اكىمىنىڭ باسپا ءسوز قىزمەتى
