كەش اياسىندا تۇركىستان قالاسىنداعى №21 جالپى ورتا مەكتەبىندە تاكەن ءالىمقۇلوۆتىڭ 100 جىلدىعىنا وراي مەكتەپ وقۋشىلارىنىڭ قاتىسۋىمەن شارا جانە «ۇلى دالانىڭ دارا دانالارى» اتتى كىتاپ كورمەسى ۇيىمداستىرىلدى.
ال تۇركىستان قالاسى ق. ا. ياسساۋي اتىنداعى حقتۋ «مادەنيەت ۇيىندە» وتكەن شارا ر.سەيتمەتوۆ اتىنداعى تۇركىستان سازدى دراما تەاترىنىڭ ارتىستەرى تاكەن مەن اسقار وبرازىندا ولەڭ وقىپ، «قاراتاۋدىڭ ءتول پەرزەنتتەرى» پوەتيكالىق كومپوزيسياسىمەن اشىلدى.
قاراتاۋدىڭ قوس تالانتتى ۇلدارىن ەسكە الۋعا ارنالعان مەرەيتويلىق كەشتە اقىن، قازاقستان جازۋشىلار وداعى باسقارماسى ءتوراعاسىنىڭ ورىنباسارى باقىت بەدەلحان ۇلى مەن قازاقستاننىڭ مەملەكەتتىك جانە «الاش» حالىقارالىق ادەبي سىيلىعىنىڭ لاۋرەاتى، اقىن، جازۋشى ەسەنعالي ءابدىجاپپار ۇلى، سونداي-اق شەشەن رەسپۋبليكاسىنىڭ ۇلت نامىسى وردەنىنىڭ يەگەرى، شەشەنستان مەملەكەتتىك جانە قازاقستان جازۋشىلار وداعىنىڭ ءى.جانسۇگىروۆ اتىنداعى سىيلىقتارىنىڭ لاۋرەاتى، ەل مويىنداعان كورنەكتى اقىن رافاەل نيازبەك ۇلى، سوزاق اۋدانىنىڭ اكىمى سالىحان سابىر ۇلى باستاعان دەلەگاسيا ءحقتۋ-نىڭ ستۋدەنتتەرى، بۇقارالىق اقپارات قۇرالدارى وكىلدەرى قاتىستى.
زامانداس قالامگەرلەر ءسوز زەرگەرلەرىنىڭ شىعارماشىلىعى، قاتار جۇرگەن كەزدەرى تۋرالى ەستەلىكتەر ايتتى. ولاردىڭ ارتىندا قالعان مول مۇراسى، قازاق ادەبيەتىندە قالدىرعان ەڭبەكتەرى حالىق ءۇشىن قۇندى دۇنيەگە اينالادى دەيدى قالامگەرلەر.
كەشكە قاتىسقان وبلىس اكىمىنىڭ ورىنباسارى مالىك وتاربايەۆ ءسوز سويلەپ، تاكەن ءالىمقۇلوۆتىڭ جۇبايى ەسىمكۇل ءالىمقۇلوۆا مەن اسقار سۇلەيمەنوۆتىڭ ۇلى الىشەر سۇلەيمەنوۆكە وبلىس باسشىسى ج. تۇيمەبايەۆتىڭ اتىنان سىي-سياپاتىن تابىس ەتتى. «قۇلاگەردەي قالامگەرلەردىڭ اتىن ارداقتاۋ، قۇرمەت تۇتىپ قاستەرلەۋ، بيىككە كوتەرۋ، مۇرا ەتىپ قالدىرعان التىن قازىنالارىن كەلەشەك ۇرپاققا جەتكىزۋ، بارشامىزدىڭ پارىزىمىز. ادەبي شوعىردا ورنى بولەك ءسوز سايگۇلىگى، قازاقتىڭ قارا ءسوزىنىڭ زەرگەرى اتانعان كورنەكتى جازۋشى، اقىن تاكەن ءالىمقۇلوۆتىڭ تۋىلعانىنا 100 جىل جانە دە تۋمىسى بولەك تۇلعا، وزگەشە دارىن يەسى اسقار سۇلەيمەنوۆتىڭ 80 جىلدىعىنا ارنالعان مەرەيلى مەرەكە قازاقستان كولەمىندە اتالىپ وتۋدە. ەلىم دەپ ەڭسەسىن تىكتەگەن، ۇلتىم دەپ ۇيقىسى قاشقان ايتۋلى تۇلعالاردىڭ تۇعىرى قاشان دا بيىك»،- دەدى مالىك وتاربايەۆ. شارا سوڭى وبلىس ونەرپازدارىنىڭ كونسەرتتىك باعدارلاماسىنا ۇلاستى.
تۇركىستان وبلىسى اكىمى باسپا ءسوز قىزمەتى.
