«فاريزا» سپەكتاكلىن قويۋداعى باستى ماقسات – ورەلى اقىن، قوعام قايراتكەرى، ەلىمىزگە تانىمال تۇلعانى حالىققا تەرەڭ تانىتۋ، قوعامدى ادەبي-مادەني تۇرعىدا بايىتۋ، جاستاردىڭ ينتەللەكتۋالدىق بەلسەندىلىگىن دامىتۋ، تەاتر ساحناسىندا تەحنيكالىق مۇمكىندىكتەردى پايدالانا وتىرىپ كورەرمەننىڭ قىزىعۋشىلىعىن ارتتىرۋ.
– بۇل – سپەكتاكل كورەرمەننىڭ نازارىن اۋدارۋ ادىسىمەن، زاماناۋي تەحنولوگيالىق قۇرىلعىلارىمەن، ايرىقشا دەكوراسيامەن، ساحنا كوڭىل-كۇيىنە سايكەس ارنايى جازىلعان مۋزىكامەن ەرەكشەلەنەدى. پەسا قازاق تىلىندە قويىلادى، ورىس تىلىنە ىلەسپە اۋدارما جاسالادى، – دەدى ا.كوپباساروۆا.
باستى رولدەگى كەيىپكەرلەردى «دارىن» مەملەكەتتىك سىيلىعىنىڭ لاۋرەاتى نازگۇل قارابالينا، قازاقستاننىڭ ەڭبەك سىڭىرگەن قايراتكەرى قۋاندىق قىستىقبايەۆ، قازاقستاننىڭ ەڭبەك سىڭىرگەن قايراتكەرى، «پاراسات»، «قۇرمەت» وردەندەرىنىڭ يەگەرى لەيلا بەكنازار-حانينگا جانە ەرلان كارىبايەۆ سومدايدى.
ايتا كەتەيىك، «فاريزا» سپەكتاكلى بار بولعانى كورەرمەن نازارىنا ءتورت رەت ۇسىنىلعان. العاش رەت الماتى، ماسكەۋ قالالارىندا، سونداي-اق ەلوردامىز نۇر-سۇلتاندا قويىلعان. شىنشىل دا سىرشىل ولەڭدەرىمەن جۇرتتىڭ جۇرەگىنە جول تاپقان، ادالدىعى مەن اقىندىعى تەڭ تۇسەتىن، قايسار دا قايتالانباس تالانت يەسى – فاريزا وڭعارسىنوۆانىڭ ءومىرى مەن ولەڭى تۋرالى پەسانى «A+A Idea Fabric» پروديۋسەرلىك ورتالىعىنىڭ تاپسىرىسىمەن دراماتۋرگ روزا مۇقانوۆا جازىپ شىقتى.
