«Fariza» spektaklin qoiýdaǵy basty maqsat – óreli aqyn, qoǵam qairatkeri, elimizge tanymal tulǵany halyqqa tereń tanytý, qoǵamdy ádebi-mádeni turǵyda baiytý, jastardyń intellektýaldyq belsendiligin damytý, teatr sahnasynda tehnikalyq múmkindikterdi paidalana otyryp kórermenniń qyzyǵýshylyǵyn arttyrý.
– Bul – spektakl kórermenniń nazaryn aýdarý ádisimen, zamanaýi tehnologiialyq qurylǵylarymen, airyqsha dekoratsiiamen, sahna kóńil-kúiine sáikes arnaiy jazylǵan mýzykamen erekshelenedi. Pesa qazaq tilinde qoiylady, orys tiline ilespe aýdarma jasalady, – dedi A.Kópbasarova.
Basty róldegi keiipkerlerdi «Daryn» memlekettik syilyǵynyń laýreaty Nazgúl Qarabalina, Qazaqstannyń eńbek sińirgen qairatkeri Qýandyq Qystyqbaev, Qazaqstannyń eńbek sińirgen qairatkeri, «Parasat», «Qurmet» ordenderiniń iegeri Leila Beknazar-Haninga jáne Erlan Káribaev somdaidy.
Aita keteiik, «Fariza» spektakli bar bolǵany kórermen nazaryna tórt ret usynylǵan. Alǵash ret Almaty, Máskeý qalalarynda, sondai-aq elordamyz Nur-Sultanda qoiylǵan. Shynshyl da syrshyl óleńderimen jurttyń júregine jol tapqan, adaldyǵy men aqyndyǵy teń túsetin, qaisar da qaitalanbas talant iesi – Fariza Ońǵarsynovanyń ómiri men óleńi týraly pesany «A+A Idea Fabric» prodiýserlik ortalyǵynyń tapsyrysymen dramatýrg Roza Muqanova jazyp shyqty.
