ءوڭىردىڭ دامۋى جانە «Nur Otan» پارتياسىنىڭ جول كارتاسىنىڭ جۇزەگە اسىرىلۋ برىسى ءسوز بولعان جيىنعا فراكسيا جەتەكشىسى بەيسەن تاجىبايەۆ ءتوراعالىق ەتىپ، جۇرگىزىپ وتىردى. ول «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك وڭىرلەردە فراكسيانىڭ جۇمىسىن كۇشەيتۋ، وتكىر پروبلەمالاردى شەشۋگە ىقپال ەتۋدى جۇكتەگەنىن، وسى باعىتتا جۇمىس ءجۇرىپ جاتقانىن مالىمدەدى.
كۇن تارتىبىندەگى ءبىرىنشى ماسەلە بويىنشا تۇركىستان وبلىسىنىڭ ستراتەگيا جانە ەكونوميكالىق دامۋ باسقارماسىنىڭ باسشىسى قانات قايىپبەكتىڭ بايانداماسى تىڭدالدى. ونىڭ ايتۋىنشا، 3 جىلدا اتقارىلعان اۋقىمدى جۇمىستاردىڭ ناتيجەسىندە تۇركىستان قالاسىن دامىتۋدىڭ 1-كەزەڭى اياقتالىپ، نەگىزگى الەۋمەتتىك ينفراقۇرىلىمى قالانعان. جالپى 445 ملرد. تەڭگەگە جاڭا 257 نىساننىڭ قۇرىلىسى جۇرگىزىلگەن. ونىڭ ىشىندە 230 ملرد. تەڭگەسى جەكە ينۆەستيسيالار ەسەبىنەن قولعا الىنعان. وڭىردە بارلىق سالا بويىنشا جۇيەلى جۇمىستار اتقارىلىپ جاتىر. ەكونوميكالىق، الەۋمەتتىك ينديكاتورلاردىڭ ورىندالۋى جاقسى.
«Nur Otan» فراكسياسى دەپۋتاتتارىن تۇركىستان وبلىسىنىڭ كەيبىر اۋىلدارىندا عالامتور جىلدامدىعىنىڭ تومەندىگى الاڭداتىپ، وسى ماسەلە توڭىرەگىندە وتكىر سۇراقتار قويدى. بۇل ساۋالدار تۇركىستان وبلىسىنىڭ سيفرلاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى ەلنۇر وتەبايەۆقا باعىتتالعان بولاتىن. باسقارما باسشىسى الدىمەن ءوزى جاۋاپتى باسقارمانىڭ ءوڭىردى ينتەرنەتپەن قامتۋ جولىنداعى جۇمىستارىن باياندادى. ونىڭ ايتۋىنشا، تۇركىستان قالاسىن سيفرلاندىرۋ باعىتىنداعى 48 باستامانىڭ 25ء-ى ىسكە اسىرىلعان. قارجىنى وڭتايلاندىرۋ، جۇمىستى جۇيەلەۋ ناتيجەسىندە 2020 جىلى وبلىستىق بيۋدجەتكە كەزەڭ-كەزەڭىمەن 244،5 ملن. تەڭگە ۇنەمدەلىپ، قايتارىلعان.
– بۇدان باسقا، تەلەفون اپپاراتتارىنىڭ ابونەنتتىك تولەمدەرى 1064 تەڭگەدەن 350 تەڭگەگە دەيىن، حالىقارالىق تەلەفون سويلەسۋلەرىنە كەتەتىن شىعىندار مينۋتىنا 39 تەڭگەدەن 7 تەڭگەگە دەيىن تومەندەتىلدى. اۋداندار، قالالار، وبلىس اكىمدىگى مەن باسقارمالار اراسىندا ءليميتسىز تەگىن سويلەسۋلەر قامتاماسىز ەتىلدى. وبلىستا 838 ەلدى مەكەن بار. ونىڭ ىشىندە 481 ەلدى مەكەندە (57،3%) 3G جانە 4G ءموبيلدى ينتەرنەتى، 206 اۋىلدا (24،6%) 2G ءموبيلدى ينتەرنەتى قول جەتىمدى. ءوڭىردى ساپالى عالامتورمەن قامتۋ جۇمىستارى جالعاسىپ جاتىر، – دەدى باسقارما باسشىسى.
دەپۋتاتتار ءموبيلدى بايلانىسى ناشار جانە مۇلدەم جوق 151 ەلدى مەكەننىڭ ماسەلەسى جونىندە ساۋالدار جولدادى. وبلىستا رەسپۋبليكالىق، وبلىستىق، اۋداندىق جانە قالالىق ماڭىزى بار اۆتوجولداردىڭ 3400 شاقىرىمىندا، ياعني، 51،5 پايىزىندا ينتەرنەت پەن ۇيالى بايلانىستىڭ جوق ەكەندىگى دە وتكىر سىنالدى. «كسەلل» اق، «بيلاين» اق وكىلدەرىنە دە ءتيىستى ۇسىنىستار ايتىلدى.
ق ر سيفرلىق دامۋ مينيسترلىگىنىڭ ۇيالى بايلانىس وپەراتورلارىمەن مەموراندۋمى اياسىندا «250+» جوباسى ارقىلى 151 اۋىلدىڭ 80ء-نىن ۇيالى بايلانىسپەن قامتاماسىز ەتۋ جوسپارلانعان. الايدا بايلانىس وپەراتورلارى كورسەتىلگەن 58 ەلدى مەكەندە عانا جۇمىس جۇرگىزگەن. سونىمەن بىرگە فراكسيا وتىرىسىندا تۇركىستان وبلىسى ءۇشىن ارحيۆكە ارنالعان عيمارات قاجەت ەكەنى ايتىلدى. دەپۋتاتتار بۇل سالاداعى تۇيتكىلدىڭ كوپ ەكەنىنە توقتالىپ، ول كەمشىلىكتەر جول كارتاسى ينديكاتورلارىن ورىنداۋعا كەرى اسەرىن تيگىزەتىنىن جەتكىزدى. اتالعان پروبلەما الداعى ۋاقىتتا بولەك تالقىلانىپ، ناقتى ۇسىنىستار جولداناتىن بولدى.
كۇن تارتىبىندەگى ءۇشىنشى ماسەلە بويىنشا وڭىردەگى قازبا بايلىقتاردى زاڭدى پايدالانۋداعى كەدەرگىلەر، وسى سالاداعى جۇمىستار سارالاندى. وبلىستىق ينۆەستيسيا جانە ەكسپورت باسقارماسى باسشىسىنىڭ ورىنباسارى قانات شونباسوۆتىڭ مالىمدەۋىنشە، وبلىس اۋماعىندا كەڭ تارالعان پايدالى قازبالاردى وندىرۋگە جالپى 110 كەلىسىمشارت جانە 38 ليسەنزيا بەرىلگەن.
– زەردەلەۋ ناتيجەسىندە وبلىس اۋماعىندا جالپى كەلىسىمشارت مىندەتتەمەلەرىن تولىق ورىنداماعانى ءۇشىن 18 كەلىسىمشارت جانە 4 ليسەنزيانىڭ كۇشى مەرزىمىنەن بۇرىن توقتاتىلدى. ونىڭ ىشىندە، اقسۋ وزەنى ماڭىندا ورنالاسقان 10 جەر قويناۋىن پايدالانۋعا ارنالعان 5 رۇقسات قۇجاتتارى كەرى قايتارىلدى. قازىرگى تاڭدا، وبلىس اۋماعىندا كەڭ تارالعان پايدالى قازبالاردى وندىرۋگە ارنالعان كەلىسىمشارت، ليسەنزيا سانى 148-دەن 124-كە ازايدى، – دەدى ق.شونباسوۆ.
فراكسيا مۇشەلەرى جەر قويناۋىن پايدالانۋشىلار اراسىندا زاڭدى بەلدەن باساتىندار ءالى دە كوپ ەكەنىن، ليسەنزياسى بار تۇلعالاردىڭ ءتىزىمىن دەپۋتاتتارعا بەرۋ جونىندە ۇسىنىس بەردى.
«وزەن، كول، ورمان، تاريحي ورىندار اۋماقتارىن كوزدىڭ قاراشىعىنداي ساقتاۋ كەرەك. وكىنىشكە قاراي، اقشاعا قۇنىققان كەيبىر كاسىپكەرلەر جەر قويناۋىن پايدالانۋ ەرەجەسىن ساقتاماي، تابيعاتقا وراسان زيان كەلتىرۋدە. ءبىز وسى زاڭسىزدىقتاردىڭ الدىن الۋدا ءتيىستى باسقارمامەن، اكىمدىكتەرمەن بىرلەسىپ جۇمىس ىستەۋگە دايىنبىز»، – دەيدى نۇروتاندىق دەپۋتاتتار.
ماجىلىستەگى ماسەلەلەر حاتتاماعا ءتۇسىرىلىپ، قاۋلى قابىلداندى. عالامتورمەن قامتۋدى جەدەلدەتۋ، جەر قويناۋىن زاڭسىز پايدالانۋشىلاردان قورعاۋ ءىس-شارالارىنا دەپۋتاتتاردان جۇمىسشى توپ قۇرىلىپ، تەكسەرۋگە شىعاتىن بولدى. تۇيتكىلدەر پارتيانىڭ باقىلاۋىنا الىندى.
(سۋرەتتەردىڭ اۆتورى: انتون لەششەنكو)
