«سەنىم» دەنساۋلىق ساقتاۋ قىزمەتكەرلەرىنىڭ كاسىپوداعى العاش رەت سەمينار وتكىزدى. دالىرەگى، وبلىستىق دەڭگەيدە قۇرىلعان قاۋىمداستىق اۋداندارداعى ءتوراعالارىن جيناپ، كاسىپوداقتىڭ نەگىزگى مىندەتى مەن مەن قوعامداعى ءرولى تۋرالى ءتۇسىندىردى.



ۇجىمدىق ويىن جانە قىزۋ پىكىرتالاس. «سەنىم» قوعامدىق بىرلەستىگى ءدال وسىنداي ەرەكشە فورماتتا كاسىپوداق كوشباسشىلارىنىڭ قاتىسۋىمەن العاشقى سەمينارىن وتكىزدى. بۇل جيىنعا قاتىسقان مەديسينا سالاسىنىڭ ماماندارى دا بارىنشا بەلسەندى. ماسەلەن، كاسىپوداقتىڭ ەڭ جاس مۇشەسى نۇربول وڭداربەكوۆ سەمينارعا سوزاق اۋدانىنان ارنايى كەلگەن. ول «قوعامدىق بىرلەستىكتىڭ قىزمەتتەگى پايداسى مەن تيىمدىلىگىن تەرەڭىرەك ءبىلدىم» دەيدى.

جاڭادان قۇرىلعان قاۋىمداستىق ەڭبەك قاتىناستارىنداعى الەۋمەتتىك-ەكونوميكالىق ماسەلەلەردى رەتتەۋ، قىزمەتكەرلەردىڭ ەڭبەك قۇقىقتارى مەن مۇددەلەرىن قورعاۋ، ارىپتەستىك قاتىناستارىن دامىتۋ جانە ۇيىمداستىرۋ جۇمىستارىمەن اينالىسادى.

سونداي-اق، «سەنىم» ق ر كاسىپوداقتار فەدەراسياسىنىڭ قۇرامىنا كىرگەننەن باستاپ اۋدان-قالالاردى ارالاپ، كاسىپوداق قوزعالىسىن قارقىندى تۇردە جۇرگىزىپ كەلەدى.

روزا كۇشەنوۆا، «سەنىم» كاسىپوداعى باسشىسىنىڭ ورىنباسارى: «ءبىز ەڭبەك داۋى جانە قارجىلىق ماسەلەلەر سىندى ءبىرقاتار تاقىرىپتار بويىنشا مەديسينا قىزمەتكەرلەرىنىڭ ساۋاتتىلىعىن ارتتىرۋدى كوزدەيمىز. ءبىزدىڭ ۇيىم جاقىندا عانا اشىلعاندىقتان، بۇل وقىتۋ سەمينارى العاش رەت وتكىزىلىپ وتىر. ءبىرىنشى باسقوسۋعا كاسىپوداق ءتوراعالارىن شاقىرۋدى ۇيعاردىق. كەيىننەن باسقا دا قاۋىمداستىق مۇشەلەرى ارنايى وقۋدان وتەتىن بولادى. بۇل جيىنعا سايرام، ماقتاارال، كەنتاۋ، سارىاعاش سىندى اۋدانداردىڭ دەنساۋلىق ساقتاۋ قىزمەتىنىڭ 40-تان استام بەلدى وكىلدەرى كەلدى».

سەميناردى ۇيىمداستىرۋشىلار كەلەسى جىلى كاسىپوداق مۇشەلەرىنىڭ سانى كوبەيتىپ، ولاردى وقىتۋ جۇيەسىنىڭ وزگە دە ءتيىمدى ادىستەرىن قولدانۋدى جوسپارلاپ وتىر. سونىمەن بىرگە، قوعامدىق بىرلەستىك جاستار رەسۋرستارىن كوبىرەك پايدالانىپ، ولاردى وقىتۋ جانە جان-جاقتى دامىتۋعا باعىتتالعان جۇمىستاردى قولعا الماق.