Ujymdyq oıyn jáne qyzý pikirtalas. «Senim» qoǵamdyq birlestigi dál osyndaı erekshe formatta kásipodaq kóshbasshylarynyń qatysýymen alǵashqy semınaryn ótkizdi. Bul jıynǵa qatysqan medısına salasynyń mamandary da barynsha belsendi. Máselen, kásipodaqtyń eń jas múshesi Nurbol Ońdarbekov semınarǵa Sozaq aýdanynan arnaıy kelgen. Ol «qoǵamdyq birlestiktiń qyzmettegi paıdasy men tıimdiligin tereńirek bildim» deıdi.
Jańadan qurylǵan qaýymdastyq eńbek qatynastaryndaǵy áleýmettik-ekonomıkalyq máselelerdi retteý, qyzmetkerlerdiń eńbek quqyqtary men múddelerin qorǵaý, áriptestik qatynastaryn damytý jáne uıymdastyrý jumystarymen aınalysady.
Sondaı-aq, «Senim» QR Kásipodaqtar federasıasynyń quramyna kirgennen bastap aýdan-qalalardy aralap, kásipodaq qozǵalysyn qarqyndy túrde júrgizip keledi.
Roza Kúshenova, «Senim» kásipodaǵy basshysynyń orynbasary: «Biz eńbek daýy jáne qarjylyq máseleler syndy birqatar taqyryptar boıynsha medısına qyzmetkerleriniń saýattylyǵyn arttyrýdy kózdeımiz. Bizdiń uıym jaqynda ǵana ashylǵandyqtan, bul oqytý semınary alǵash ret ótkizilip otyr. Birinshi basqosýǵa kásipodaq tóraǵalaryn shaqyrýdy uıǵardyq. Keıinnen basqa da qaýymdastyq músheleri arnaıy oqýdan ótetin bolady. Bul jıynǵa Saıram, Maqtaaral, Kentaý, Saryaǵash syndy aýdandardyń densaýlyq saqtaý qyzmetiniń 40-tan astam beldi ókilderi keldi».
Semınardy uıymdastyrýshylar kelesi jyly kásipodaq músheleriniń sany kóbeıtip, olardy oqytý júıesiniń ózge de tıimdi ádisterin qoldanýdy josparlap otyr. Sonymen birge, Qoǵamdyq birlestik jastar resýrstaryn kóbirek paıdalanyp, olardy oqytý jáne jan-jaqty damytýǵa baǵyttalǵan jumystardy qolǵa almaq.
