جيىن بارىسىندا بايانداما جاساعان «ينجەنەريا» فاكۋلتەتىنىڭ وقىتۋشىسى نۇرباي دوسانوۆ بۇگىنگى ەلىمىزدىڭ ساياسي، ەكونوميكالىق، عىلىمي، حالىقارالىق ماڭىزى بار ماسەلەلەر توعىسىندا، ينتەرنەت پەن ۇيالى بايلانىستاردىڭ جازارماندارى مەن قولدانۋشىلارى، اسىرەسە جاستار لاتىن ءتىلىنىڭ قاجەتتىلىگىن ەرتە تۇسىنگەنىن العا تارتتى.
– تۇركى تىلدەس ەلدەر ءۇشىن لاتىن گرافيكاسىن ەنگىزۋ ارقىلى بىزدەر، بۇكىل دۇنيەجۇزىندەگى قازاق حالقىن بىرىكتىرۋ يدەياسىن جۇزەگە اسىرامىز. لاتىن گرافيكاسىنداعى قازاق الىپبيىنە كوشۋدەگى ۇتارىمىز، باتىستىق دامىعان مەملەكەتتەرمەن تەرەزەمىز تەڭەسىپ، تۇركى الەمىمەن اقپاراتتىق-مادەني ينتەگراسيامىز نىعايادى جانە ەلىمىزدىڭ ءبىلىم دەڭگەيى الەمدىك ءبىلىم دەڭگەيىنە كوتەرىلۋىنە، باستاۋىش ساتىدا وقۋ جۇكتەمەسىنىڭ ازايىپ، ءبىلىم ساپاسىنىڭ ارتۋىنا جاڭا مۇمكىندىكتەر تۋادى. ويتكەنى قازىرگى وزگەرمەلى، اقپاراتتىق كوممۋنيكاسيالىق زاماندا لاتىن الىپبيىنە نەگىزدەلگەن ساۋات اشۋ قاجەتتىلىگى تۋىنداپ وتىر، – دەدى «ينجەنەريا» فاكۋلتەتىنىڭ وقىتۋشىسى نۇرباي دوسانوۆ.
جيىن بارىسىندا وسى ايتىلعانداردى نەگىزگە الا وتىرىپ، قازىرگى اقپاراتتىق زامان تالابىنا سايكەس لاتىنعا نەگىزدەلگەن ۇلتتىق قۇندىلىقتارىمىزدى ساقتاي وتىرىپ، ساۋات اشۋ وقۋلىقتارىن، وقۋ ادىستەمەلىك قۇرالدارىن قۇراستىرۋ قاجەت ەكەنى ايتىلدى.
– لاتىن قارپىنە بايلانىستى كوشۋدى كوپتەن بەرى قوعام جانە مەملەكەت قايراتكەرلەرى ايتىپ، باستاما كوتەرىپ كەلەدى. لاتىن الىپبيىنە كوشۋ، قايتا جاڭعىرۋ زامانىنداعى ەلىمىزدىڭ، مادەنيەتتىڭ، ءتىلدىڭ دامۋىنا، قولدانىسىن كەڭەيتۋگە كۇشتى اسەر ەتەدى، قازاق تىلىنە ايرىقشا ماڭىز بەرىپ، قايتادان جاپپاي وقۋعا سەبەپ بولادى. ءتۇبى ءبىر تۇركى جۇرتىنىڭ رۋحاني ۇندەسۋىنە، لاتىن ءقارپى جارقىن جول اشادى، – دەدى وقۋ ادىستەمەلىك ىستەر جونىندەگى دەكان ورىنباسارى PhD،. دوسەنت دىنمۇحاممەد كەلەسبايەۆ.
