بۇگىندە پيلوتتىق جوبا اياسىندا تۇركىستان قالاسىنىڭ قيىلىسىندا 26 «سەرگەك» كامەرالارى ورنالاسقان. سونىمەن قاتار جاياۋ جۇرگىنشىلەر وتكەلى بار جەرلەردە 30 جەلىلىك «سەرگەك» كەشەندەرى جانە قالا ىشىندەگى قوعامدىق ءتارتىپتى ساقتاۋ ماقساتىندا قويىلعان 200 بەينەباقىلاۋ كامەرالارى جۇمىس ىستەۋدە.
بىلتىر «سەرگەك» پيلوتتىق جوباسىن ىسكە اسىرۋ بويىنشا تۇركىستان وبلىسىنىڭ اكىمدىگى مەن پوليسيا دەپارتامەنتى جانە «كوركەم تەلەكوم» ج ش س اراسىندا مەموراندۋمعا قول قويىلعان بولاتىن.
سونداي-اق تۇركىستان قالاسىندا «قورعاۋ» جۇيەسى ىسكە قوسىلدى. اتالعان جۇيە «سەرگەك» كامەرالارىنىڭ كومەگىمەن پاترۋلدىك پوليسيا قىزمەتكەرىنە 10 مينۋت ىشىندە جول ءجۇرۋ ەرەجەسىن بۇزعان اۆتوكولىكتەردى، جالعان نومىرلەر ورناتىلعانىن، ايىپپۇل تولەنبەگەنىن حابارلاي الاتىن نەمەسە ىزدەۋدە جۇرگەن قىلمىسكەرلەر تۋرالى اقپاراتتى بەرىپ وتىرادى.
وبلىس اۋماعىنداعى اۆتوكولىك تاس جولدارىندا ورنالاسقان «سەرگەك» كەشەنىندەرىن ايتا كەتەتىن بولساق، بۇل جەلىلىك كامەرا كەشەندەرى P-31 اۆتوجولىنىڭ كەنتاۋ-تۇركىستان باعىتى بويىندا (ورانعاي اۋىلدىق وكرۋگى)، م-32 حالىقارالىق اۆتوجولىنىڭ تۇركىستان-شىمكەنت باعىتى بويىندا (سپاتايەۆ، كوكارال، قاينار، شۇبارسۋ ەلدى مەكەندەرى)، ا-2 اۆتوجولىنىڭ تۇلكىباس-شىمكەنت پەن شىمكەنت-تاشكەنت باعىتتارى بويىندا (اتامەكەن، قۇلتۋما، قارابۇلاق، رابات ەلدى مەكەندەرى)، ا-15 اۆتوجولىنىڭ (بەسقۇبىر جانە جاڭا ءداۇىر اۋىلىنا بۇرىلعان جەردە) بويىندا ورنالاسقان.
