تۇركىستاندا ۇلى وتان سوعىسىنداعى جەڭىستىڭ 80 جىلدىعى مەرەيتويى اياسىندا «1941-1945 جىلدارداعى ۇلى وتان سوعىسى — قازاقستاننىڭ وڭتۇستىگىنىڭ تاريحىندا» اتتى حالىقارالىق عىلىمي-تاجىريبەلىك كونفەرەنسيا ءوتتى،– دەپ حابارلايدى Dalanews.kz
كونفەرەنسيا تۇركىستان وبلىسىنىڭ سيفرلاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسىنا قاراستى تۇركىستان وبلىسىنىڭ مەملەكەتتىك ءارحيۆى جانە تۇركىستان وبلىسىنىڭ قوعامدىق-ساياسي تاريحىنىڭ مەملەكەتتىك ءارحيۆى مەكەمەلەرىنىڭ ۇيىمداستىرۋىمەن تۇركىستان قالاسىنداعى دوستىق ۇيىندە ءوتتى.
شاراعا وزبەكستان، رەسەي ەلدەرى مەن الماتى، شىمكەنت، قاراعاندى، ورال، تۇركىستان قالالارىنان تاريح جانە پەداگوگيكا عىلىمى سالاسىنىڭ وكىلدەرى، ارحيۆ قىزمەتكەرلەرى، جوعارى وقۋ ورنىنىڭ ستۋدەنتتەرى مەكتەپ وقۋشىلارى وففلاين جانە ونلاين فورماتتا قاتىستى.
كونفەرەنسيادا «ۇلى جەڭىس – ۇرپاققا مۇرا، تاريحقا تاعزىم» اتتى ارحيۆتىك قۇجاتتار كورمەسى ۇسىنىلدى. ودان بولەك، «وڭتۇستىك قازاقستان 1941-1945 جىلدارى ۇلى وتان سوعىسى جىلدارىندا» اتتى قۇجاتتار جيناعىنىڭ تۇساۋكەسەرى ءوتىپ، كوپشىلىك قاۋىمعا تانىستىرىلدى.
اتالعان ءىس-شارا بارىسىندا كەزدەسۋدە ۇلى وتان سوعىسىنداعى جەڭىس مەرەكەسىنىڭ 80 جىلدىعىن مەرەكەلەۋدىڭ ماڭىزدىلىعى مەن وڭتۇستىك ءوڭىرىنىڭ ۇلى جەڭىسكە جاساعان اۋقىمدى ۇلەستەرى باياندالدى.
ودان بولەك، سوعىس ارداگەرلەرى مەن تىل ەڭبەككەرلەرىنىڭ ەرلىگى، قاھارماندىعى مەن قايسارلىعى باياندالدى. سونداي-اق، كونفەرەنسيادا ۇلى وتان سوعىسى تۋرالى تانىمدى تەرەڭدەتۋ، جەرگىلىكتى تاريحتىڭ جاڭا بەتتەرىن اشۋ، تاريحي ادىلەتتىلىك پەن پاتريوتتىق تاربيە جونىندە باياندامالار وقىلىپ، مالىمەتتەر بەرىلدى.
