تۇركىستان قالاسىنىڭ اكىمشىلىك-ىسكەرلىك ورتالىعىندا ۇلكەن جاساندى كولى بار جاڭا قالالىق ساياباقتىڭ قۇرىلىسى ءجۇرىپ جاتىر، – دەپ حابارلايدى Dalanews.kz
بۇل قالا تۇرعىندارى مەن قوناقتارى ءۇشىن جايلى دەمالىس ايماعىن قالىپتاستىرۋعا باعىتتالعان تۇركىستانداعى ءىرى جوبالاردىڭ ءبىرى.
وسى رەتتە، قالا اكىمى ازىمبەك پازىلبەك ۇلى ساياباق قۇرىلىسىن باقىلاپ، سالا ماماندارىمەن جانە مەردىگەر مەكەمە وكىلدەرىمەن كەزدەستى. قۇرىلىس بارىسىنداعى ءبىرقاتار كەمشىلىكتەردى رەتكە كەلتىرىپ، ۋاقىتىلى، ساپالى ورىنداۋدى تاپسىردى.
ساياباقتىڭ جالپى اۋماعى - 32 گەكتاردى قۇراسا، ونىڭ ءدال ورتاسىندا كولەمدى، جاساندى كول بولماق. ساياباق ىشىندە جاياۋ جۇرگىنشىلەر كوپىرى، سۋبۇرقاقتار، سارقىراما، تاماشالاۋ الاڭدارى، زاماناۋي قوعامدىق تاماقتانۋ ورىندارى، ارحيتەكتۋرالىق اركالار مەن ارنايى ورىندىقتار قاراستىرىلعان.
قۇرىلىستىڭ تولىق اياقتالۋى 2025 جىلعا جوسپارلانعان. جوبا كەزەڭ-كەزەڭىمەن جۇزەگە اسىرىلۋدا. قازىرگى تاڭدا نەگىزگى قۇرىلىمدار بوي كوتەرىپ، سوڭعى قۇرىلىس جۇمىستارى ءجۇرىپ جاتىر.
