2016 جىلى قۇرىلىسى باستالعان وقۋ عيماراتىندا 10 سىنىپ بولمەسى، اسحانا، سپورت زالى مەن ءماجىلىس زالى جانە مەدپۋنكت قاراستىرىلعان. جوبانىڭ قۇنى 374 ملن. تەڭگەنى قۇرايدى.
بۇعان دەيىن اتالعان مەكتەپتىڭ ەسكى عيماراتى جەتىسپەگەندىكتەن، كەڭەس تاۋەلسىزدىك جىلدارىنا دەيىن جۇمىس جاساپ كەلگەن «جۇلدىزشا» بالاباقشاسىنىڭ عيماراتى شاكىرتتەردىڭ سىنىبى رەتىندە پايدالانىلىپ كەلگەن. وسىنداي ورىنداردا ءتالىم العان 1179 وقۋشىنىڭ الداعى كۇندەرى الاڭسىز ءبىلىم الۋىنا تولىق جاعداي جاسالىپ وتىر.
بۇدان سوڭ وبلىس باسشىسى تۇركىستان قالاسىنا قاراستى قۇمتيىن ەلدى مەكەنىندەگى «قۇلىنشاق» بالاباقشاسىنىڭ اشىلۋ سالتاناتىنا قاتىستى. قۇرىلىسى وتكەن جىلى باستاۋ العان بۇلدىرشىندەردىڭ التىن ۇياسى اۋىل تۇرعىندارى ءۇشىن كۇردەلى ماسەلەنىڭ ءبىرى بولىپ كەلگەن. 1825 تۇرعىنى بار قۇمتيىن ەلدى مەكەنىندەگى مەكتەپ جانىنداعى شاعىن ورتالىقتا 80 بالا تاربيەلەنىپ كەلگەن. ەندىگى جەردە 120 ورىندىق تيپتىك ۇلگىدەگى بالاباقشا عيماراتى مۇنداعى كۇرمەۋلى ماسەلەنىڭ شەشىمىنە بالانىپ وتىر.
تۇركىستان قالاسىنا جاساعان جۇمىس ساپارىندا وڭتۇستىك قازاقستان وبلىسىنىڭ اكىمى ج.تۇيمەبايەۆ ءسۇت ونىمدەرىن قايتا وڭدەيتىن «مۇزدى تاۋ» ءوندىرىس ورنىنىڭ جۇمىسىمەن تانىستى. 2013 جىلدان بەرى بالمۇزداقتىڭ 30 ءتۇرىن شىعاراتىن ءوندىرىس ورنى ونىمدەرىن ەلىمىزدىڭ 5 وبلىسىنا تاراتىپ كەلەدى. جالپى قۇنى 450 ملن. تەڭگەنى قۇرايتىن جوبانىڭ جىلدىق قۋاتتىلىعى 900 توننا ءونىم شىعارۋعا قاۋقارلى. 2016 جىلى كاسىپورىن 118،6 ملن. تەڭگەنىڭ ءونىمىن وندىرسە، بيىل 140 ملن. تەڭگەنىڭ ءونىمىن نارىققا شىعارۋدى مەجەلەپ وتىر. مۇندا 50 ادام جۇمىسپەن قامتىلعان.
تۇرعىنداردى جۇمىسپەن قامتىپ، قالا ەكونوميكاسىنىڭ دامۋىنا ۇلەسىن قوسىپ وتىرعان كاسىپورىنعا ايماق باسشىسى وڭ باعاسىن بەرىپ، شاعىن كاسىپكەرلىكپەن اينالىسۋعا ىنتالى جاس ازاماتتارعا مەملەكەتتەن بەرىلەتىن قولداۋلاردى كەڭىنەن ناسيحاتتاۋدى قالا اكىمىنە ايتتى.
وقو اكىمىنىڭ باسپا ءسوز قىزمەتى
