ەلدى مەكەندەردىڭ الەۋمەتتىك-ەكونوميكالىق دامۋىنا ناقتى كەشەندى شارا قابىلداۋ ماقساتىندا ق ر ۇلتتىق ەكونوميكا مينيسترلىگى «اۋىل اماناتى» جانە «اۋىل – ەل بەسىگى» جوبالارىن بىرىكتىرۋدى ۇسىندى. تۇركىستان وبلىسى اكىمدىگى تاراپىنان بۇل باعىتتاعى جۇمىستار سارالانىپ، ۇسىنىستار ەنگىزىلدى،- دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

 

تۇركىستان وبلىسى اۋماعىندا جالپى 800 اۋىلدىق ەلدى مەكەن ورنالاسقان. وندا 1،6 ملن. ادام نەمەسە حالىقتىڭ 75 %-ى تۇرادى.

 

وڭىردە «اۋىل – ەل بەسىگى» جوباسى ارقىلى 602 اۋىلدىق ەلدى مەكەندى جاڭعىرتۋدان وتكىزۋ جوسپارلانعان. جوبا اياسىندا بەس جىلدا 113،2 ملرد. تەڭگە قارجى ءبولىنىپ، 1 567 جوبا جۇزەگە استى. 173 الەۋمەتتىك جانە 104 ينفراقۇرىلىمدىق نىساندار سالىنىپ، 1 571 ىشكى كوشەلەر ورتاشا جوندەۋدەن ءوتتى. ناتيجەسىندە، 328 ەلدى مەكەن قاجەتتى ينفراقۇرىلىممەن قامتىلىپ، 10 مىڭعا جۋىق جاڭا جۇمىس ورنى اشىلدى. بيىل جاڭا 52 اۋىلدى جاڭعىرتۋ جوسپارلانىپ وتىر.

 

ودان بولەك، «اۋىل اماناتى» جوباسى ارقىلى جەرگىلىكتى تۇرعىنداردىڭ جاعدايىن جاقسارتۋ، كاسىپ باستاۋعا قولداۋ كورسەتۋ كوزدەلگەن. ەكى جىلدا تۇركىستان وبلىسىندا جوبانى جۇزەگە اسىرۋعا 22،8 ملرد.تەڭگە ءبولىندى. ناتيجەسىندە، 3 293 جوبا قارجىلاندىرىلىپ، 3 665 جاڭا جۇمىس ورنى قۇىلدى. بيىل 7،4 ملرد.تەڭگەگە 1 097 جوبانى ىسكە اسىرۋ كوزدەلگەن. ناتيجەسىندە، 1 192 جاڭا جۇمىس ورنى اشىلماق.

 

جوبا شەڭبەرىندە دامۋ الەۋەتى بار ەلدى مەكەندەردىڭ تىزبەسىن ايقىنداۋ ولشەمشارتى قايتا قارالىپ، وڭىردەگى دامۋ الەۋەتى جوعارى ەلدى مەكەندەر قوسىمشا قامتىلماق. جالپى، بۇل باعدارلامادا اۋىلداردى دامىتۋعا قاتىستى باعدارلامالار مەن جوبالار بىرىكتىرىلىپ، جان-جاقتى قولداۋ كۇشەيتىلەدى.

 

ايتا كەتەيىك، تۇركىستان وبلىسىندا اتالعان جوبالاردى ىسكە اسىرۋ تاجىريبەسى ەكى جوبانى بىرىكتىرۋ بارىسىندا قولدانىلماق.