تۇركىستان وبلىسىنىڭ اكىمى دارحان ساتىبالدىنىڭ مەملەكەتتىك باعدارلامالاردىڭ مۇمكىندىكتەرىن ءتيىمدى پايدالانۋ جانە حالىق اراسىندا كەڭىنەن ناسيحاتتاۋ جونىندەگى تاپسىرماسى اياسىندا وڭىردە حالىقتىڭ تابىسىن ارتتىرۋعا باعىتتالعان «اۋىل اماناتى» جوباسى بويىنشا جۇيەلى جۇمىستار جۇرگىزىلۋدە. وسى ورايدا، تۇركىستان وبلىسى اكىمىنىڭ ورىنباسارى نۇرالحان كوشەروۆتىڭ توراعالىعىمەن «اۋىل اماناتى» جوباسىنىڭ التىنشى باعىتى اياسىندا نەسيەلەندىرۋ ءتارتىبى بويىنشا جيىن ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

جيىنعا الەۋمەتتىك كاسىپكەرلىك كورپوراسياسى، «ىرىس» مقۇ جانە «وڭتۇستىك» ايماقتىق ينۆەستيسيالىق ورتالىعىنىڭ وكىلدەرى جانە وبلىس كاسىپكەرلەرى قاتىستى.

باسقوسۋدا تۇركىستان وبلىستىق كاسىپكەرلىك جانە ونەركاسىپ باسقارماسىنىڭ باسشىسى نۇرجىگىت مىرزاحمەتوۆ وبلىس اكىمىنىڭ تاپسىرماسىنا سايكەس ازىرلەنگەن كاسىپكەرلىك باعىتىنداعى 50 بيزنەس جوبانى تانىستىردى. قۇرىلىس قولعاپ، شۇلىق، شەگە، قۇرىلىس ماتەريالدارىن جاساۋ، پليتكا ءوندىرىسى، ۇنتاق جانە حيميالىق سۇيىقتىقتاردى ءوندىرۋ، جيھاز، اعاش بۇيىمدارى، جارتىلاي دايىن تاعامدار ءوندىرۋ بويىنشا كاسىپ يەلەرى ءوز بيزنەستەرىن تانىستىرىپ، قولداۋ كورسەتۋدى سۇرادى.

شىعىنى مەن پايداسى زەردەلەگەن كاسىپكەرلىك باعىتىنداعى جوبالاردى تانىستىرعان باسقارما باسشىسى، بۇدان بولەك ءبىرقاتار پوتەنسيالدى جوبا پىسىقتالىپ جاتقانىن جەتكىزدى.

كاسىپكەرلەردىڭ جوبالارىمەن جەكە-جەكە تانىسقان تۇركىستان وبلىسى اكىمىنىڭ ورىنباسارى قولداۋ كورسەتۋگە دايىن ەكەنىن جەتكىزدى.

– ءىس باستايمىن دەسەڭىزدەر، ەشقانداي قارسىلىق بىلدىرمەيمىز. كەرىسىنشە، ىستەيمىن دەگەن ازاماتقا قولداۋ كورسەتەمىز. «اۋىل اماناتى» باعدارلاماسىنا حالىقتى تارتۋ كەرەك. مۇمكىنشىلىك كوپ. مەملەكەت ۇسىنعان قولداۋدى ءتيىمدى پايدالانىپ، جۇمىس ىستەۋ كەرەك. تەك اۋىل شارۋاشىلىعىمەن عانا اينالىسىپ قويماي، باسقا دا كاسىپكە بەيىمدەلگەن ءجون. كوتەرگەن ماسەلەلەرىڭىزدى زاڭ اياسىندا قاراپ، وڭتايلى شەشۋگە كۇش سالامىز. بىرلەسىپ جۇمىس اتقارايىق، – دەدى نۇرالحان كوشەروۆ.

كەزدەسۋدە كاسىپ يەلەرى كەدەرگى كەلتىرەتىن وزەكتى ماسەلەلەردى ورتاعا سالىپ، جەر جانە ينفراقۇرىلىم تۋرالى ءسوز قوزعادى. كوتەرىلگەن ماسەلەلەر زاڭ اياسىندا قارالىپ، شەشىمىن تابادى.

جيىن سوڭىندا كەزەكتى وتىرىس ۋاقىتى بەلگىلەنىپ، كوتەرىلگەن ماسەلەلەر بويىنشا اتقارىلعان جۇمىس ناتيجەسىن سارالاۋ كەلىسىلدى. سونداي-اق وبلىس اكىمىنىڭ ورىنباسارى جاۋاپتى باسشىلارعا تانىستىرىلعان 50 بيزنەس جوبانى قارجىلاندىرۋ دەڭگەيىنە دەيىن سۇيەمەلدەۋ جۇمىستارىن جۇرگىزۋدى تاپسىردى.