باسپا ءسوز ءماسليحاتىنان كەيىن «جاستار رەسۋرستىق ورتالىعىندا» اۋدان، قالالاردان كەلگەن ءموبيلدى كاپيتانداردىڭ قاتىسۋمەن سەمينار-ترەنينگ ءوتتى. سەميناردى تەحنيكا عىلىمدارىنىڭ دوكتورى، رەسپۋبليكالىق «امانات» ازاماتتىق پلاتفورماسىنىڭ شتاب مۇشەسى دۋامبەكوۆ مۇساعالي جۇرگىزىپ وتىردى. ول اۋداندار مەن قالالارعا بەكىتىلگەن ءموبيلددى كاپيتانداردىڭ جۇمىس باعىتتارىن ايتىپ، سايلاۋ ءۇشىن قاجەتتى جاعداي جاساۋدىڭ بەس نەگىزگى باعىتىن ءتۇسىندىردى. سايلاۋ بولىمشەلەرىنە بەكىتىلگەن باقىلاۋشىلاردىڭ قۇقىقتارى مەن جۇكتەلگەن مىندەتتەرىن ءتۇسىندىرۋ، ولاردىڭ جۇمىسىن قاداعالاۋعا باسشىلىق جاساۋ بويىنشا دارىستەر ءوتتى. سونىمەن قاتار سايلاۋ كۇنى سايلاۋشىلاردىڭ داۋىس بەرۋى كەزىندە زاڭسىزدىقتار مەن كەلەڭسىزدىكتەرگە جول بەرمەۋدىڭ الدىن-الۋ شارالارى دا ءتۇسىندىرىلدى. بارلىق قاتىسۋشىلارعا «باقىلاۋشى بلوكنوتى» تاراتىلىپ بەرىلدى.
سونداي-اق كەلەسى ءماجىلىس زالىندا وبلىس جاستارىمەن دە سەمينار-ترەنينيگ وتكىزىلدى. سەميناردى رەسپۋبليكالىق «امانات» ازاماتتىق پلاتفورماسىنىڭ شتاب باسشىسى ليما دياس جۇرگىزدى. ول ونلاين زاڭگەرلىك كەڭەس بەرۋ قىزمەتىن قۇرۋ جانە العاش رەت داۋىس بەرەتىن جاس سايلاۋشىلاردىڭ قۇقىقتارى مەن مىندەتتەرى جونىندە باياندادى. تۇركىستان وبلىسىنىڭ بارلىق وڭىرلەرىنەن جينالعان جاستار سايلاۋ جونىندە كوكەيلەرىندە جۇرگەن سۇراقتارىنا جاۋاپ الىپ، مودەراتورمەن پىكىر الماستى.
ەلىمىزدە سايلاۋ بارىسىنا قوعامدىق مونيتورينگ جۇرگىزۋ ماقساتىندا قۇرىلعان «امانات» ازاماتتىق الاڭى 22 ساۋىردەن ءوز جۇمىسىن باستاعانى بەلگىلى. 29 ساۋىردە "امانات" ازاماتتىق پلاتفورماسىنىڭ تۇركىستان وبلىستىق وكىلدىگى العاشقى جيىنىن وتكىزدى. بۇگىندە قوعامدىق ۇيىمدار مەن ب ا ق وكىلدەرى، جاستار، ساراپشىلار، ازاماتتىق بەلسەندىلەردىڭ شوعىرلانعان تاۋەلسىز ەرىكتى بىرلەستىگى جەمىستى جۇمىس اتقارىپ كەلەدى.
تۇركىستان وبلىسىنىڭ وڭىرلىك كوممۋنيكاسيالار قىزمەتى
