تۇركىستان قالاسىندا جۇمىسقا ورنالاستىرىلعان ازاماتتاردىڭ جالاقىسىن سۋبسيديالاۋعا بولىنگەن بيۋدجەت قاراجاتىن جىمقىرۋ فاكتىسى بويىنشا ايىپتاۋ ۇكىمى شىعارىلدى، دەپ حابارلايدى Dalanews.kz.

تەرگەۋ امالدارى قما تۇركىستان وبلىسى بويىنشا دەپارتامەنتى جۇرگىزدى.

«ەڭبەك موبيلدىلىگى ورتالىعى» - نىڭ بۇرىنعى ديرەكتورى، «جۇمىس بەرۋشىلەردى قولداۋ» ءبولىمىنىڭ قىزمەتكەرى، سونداي-اق ءبىرقاتار كوممەرسيالىق ۇيىمداردىڭ باسشىلارى ازاماتتاردى سۋبسيديالاناتىن جۇمىس ورىندارىنا جالعان راسىمدەۋ ارقىلى بيۋدجەت قاراجاتىن زاڭسىز الۋ سحەماسىن ۇيىمداستىرعان.

ورتالىق قىزمەتكەرى كاسىپكەرلەردىڭ ەلەكتروندىق سيفرلىق قولتاڭبالارىن پايدالانىپ، مەملەكەتتىك باعدارلامالارعا قاتىسۋ ءۇشىن وتىنىمدەر بەرگەن. وتىنىمدەردە جالعان لاۋازىمدار كورسەتىلگەن. ولار ماقۇلدانعاننان كەيىن، ەڭبەك مىندەتتەرىن ءىس جۇزىندە ورىنداماعان ازاماتتاردى جۇمىسقا قابىلداۋ تۋرالى بۇيرىقتار راسىمدەلگەن.

كاسىپكەرلەر وزدەرىنىڭ تانىستارى مەن تۋىستارىن تارتىپ، مەملەكەتتىك قولداۋ باعدارلامالارىنا قاتىسادى دەگەن جەلەۋمەن بانكتىك شوت اشۋدى ۇسىنعان، ال شىن مانىندە، بۇل شوتتار جالعان قىزمەتكەرلەرگە تولەم جاساۋ ءۇشىن پايدالانىلعان.

اي سايىن جۇيەگە جالعان جۇمىس ۋاقىتىن ەسەپكە الۋ تابەلدەرى ەنگىزىلگەن. وسى قۇجاتتار نەگىزىندە قاراجات «جۇمىسشىلاردىڭ» شوتتارىنا اۋدارىلىپ وتىرعان. الىنعان قاراجات كاسىپكەرلەرمەن قولما-قول اقشاعا اينالدىرىلىپ، ءبولىم قىزمەتكەرىنە بەرىلگەن، كەيىن ول قاراجاتتى سحەماعا قاتىسۋشىلار اراسىندا بولگەن.

ناتيجەسىندە 78 ادام جالعان ەڭبەككە ورنالاستىرىلعان. مەملەكەتكە كەلتىرىلگەن زالال 49 ملن تەڭگەدەن استى.

سوتتىڭ ۇكىمىمەن ءۇش كىنالىگە 4 جىل 6 ايدان 5 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى. ەكى كاسىپكەرگە 4 جىل 6 اي مەرزىمگە باس بوستاندىعىن شەكتەۋ جازاسى بەلگىلەندى.

سونىمەن قاتار، مەملەكەتكە كەلتىرىلگەن زالال سوتتالۋشىلار تاراپىنان تولىق كولەمدە وتەلدى.

ۇكىم زاڭدى كۇشىنە ەنگەن جوق.