تۇركىستان وبلىسىنىڭ ورتالىعىندا ورنالاسقان قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندە تۇركيا ەلىنىڭ كۆوتاسىن جەڭىپ العان تالاپكەرلەرگە تەگىن ءبىلىم بەرۋ سەرتيفيكاتتارى تابىستالدى.

بيىل اتالعان وقۋ ورنىنا تۇركيا رەسپۋبليكاسىنان 500 گرانت بولىنگەن. بۇل ۇلتتىق ءبىرىڭعاي تەستىلەۋ مەن كەشەندى تەستتەن جوعارى ۇپاي جيناپ، قازاقستاننىڭ گرانتىنا ىلىگە الماعان تالاپكەرلەرگە تەگىن ءبىلىم الۋعا بەرىلگەن مۇمكىندىك.

ءبىلىمدى جاستارعا تۇركيا گرانتىن ۇلەستىرگەن وقۋ ورنى دارىندى تالاپكەرلەرگە باسىمدىق بەرىپ وتىر. الەۋمەتتىك قولداۋ كورسەتۋگە باعىتتالعان ءبىلىم سەرتيفيكاتتارى حالىقارالىق جانە رەسپۋبليكالىق پاندىك وليمپيادانىڭ 34 جەڭىمپازىنا، الەم، ازيا، رەسپۋبليكا دەڭگەيىندە جۇلدەگەر اتانعان 10 سپورتشىعا، سونداي-اق، اتا-انا قامقورلىعىنسىز قالعان 10 تالاپكەرگە بەرىلدى. ولاردىڭ قاتارىندا ە.بالتابايەۆ، ءا. بيبارىس، ءا.ءمادي، د.رايموۆا، م. كەمەلبەك سەكىلدى بولاشاعىنان زور ءۇمىت كۇتتىرگەن سپورتشىلار مەن «اقبەرەن»، «اتا-جۇرت»، «ياساۋي»، «ءدىنتانۋ» حالىقارالىق جانە رەسپۋبليكالىق ءپان وليمپيادالارى مەن ءمۇشايرالارىنىڭ جەڭىمپازدارى بار. ال قالعان ءبىلىم گرانتتارى ۇبت مەن كەشەندى تەستتەن جوعارى ۇپاي جيناپ، الايدا مەملەكەتتىك گرانتقا ىلىگە الماعان ءبىلىمدى جاستارعا ۇلەستىرىلدى.

سونداي-اق، ۋنيۆەرسيتەت تۇلەكتەرى ن.كوكەنوۆ، ە.شالانوۆ جانە  ە.جاقىپوۆ سىندى ازاماتتاردىڭ اتىنان ماتەريالدىق از قامتاماسىز ەتىلگەن ستۋدەنتتەرگە 300 مىڭ تەڭگەنىڭ سەرتيفيكاتتارى تارتۋ ەتىلدى.

ايتا كەتەرلىگى، احمەت ياساۋي ۋنيۆەرسيتەتى ءوڭىر حالقىنىڭ الەۋمەتتىك جاعدايىن ەسكەرە وتىرىپ، بيىلدان باستاپ وقۋ تولەماقىسىن تومەندەتىپ وتىر.

 

 تۇركىستان وبلىسى اكىمىنىڭ باسپا ءسوز قىزمەتى