تۇركىستان وبلىسىنىڭ تۇرعىندارىنا سولتۇستىك وڭىرلەردەن بوس جۇمىس ورىندارى ۇسىنىلدى، دەپ حابارلايدى Dalanews.kz
قازاقستاننىڭ سولتۇستىك، ورتالىق جانە شىعىس وڭىرلەرى – تابيعي بايلىعى مول، مۇمكىندىگى كەڭ، الايدا ادام كۇشى جەتىسپەيتىن ايماقتار. اۋىل شارۋاشىلىعى مەن ءوندىرىس، ءبىلىم مەن مەديسينا سالاسىندا ەڭبەك قولىنىڭ تاپشىلىعى كۇن تارتىبىندەگى وتكىر ماسەلە.
وسى ولقىلىقتىڭ ورنىن تولتىرۋ ءۇشىن قولعا الىنعان «قونىس اۋدارۋ» باعدارلاماسى – تەك كوشى-قون ەمەس، بولاشاققا باعىتتالعان ناقتى مۇمكىندىك. جاڭا ءوڭىر – جاڭا تىنىس، جاڭا كاسىپ پەن تۇراقتىلىقتىڭ كەپىلى.
باعدارلاما تۇركىستان وبلىسىندا كەڭ كولەمدە جۇزەگە اسۋدا. جەتىساي مەن ماقتاارال اۋداندارىندا وتكەن جارمەڭكەگە ەلىمىزدىڭ 7 ايماعىنان كەلگەن دەلەگاسيالار قاتىسىپ، 10 مىڭنان استام بوس جۇمىس ورنىن ۇسىندى. حالىققا باعدارلاما شارتتارى جان-جاقتى ءتۇسىندىرىلىپ، ەڭبەكپەن، باسپانامەن جانە الەۋمەتتىك قولداۋمەن قامتاماسىز ەتۋ جولدارى باياندالدى.
باعدارلاما اياسىندا ۇسىنىلاتىن قولداۋ:
- كوشۋ شىعىندارى تولىق وتەلەدى؛
- ءبىر جىل باسپانامەن قامتۋ نەمەسە جالداۋ اقىسى مەن كوممۋنالدىق تولەمدەرىن وتەۋ؛
- تۇراقتى جۇمىسپەن قامتۋ؛
- كاسىپ اشۋعا مۇمكىندىك؛
- بالاباقشا، مەكتەپ، جەر تەلىمى سىندى الەۋمەتتىك ماسەلەلەر تولىق ەسكەرىلەدى.
جەتىساي اۋدانىنداعى جيىنعا ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتىنىڭ ءتوراعاسى اسەت باعدات ۇلى، وبلىستىق «ەڭبەك موبيلدىلىگى ورتالىعىنىڭ» ديرەكتورى ابزال داۋلەتالى ۇلى، جەتىساي اۋدانى اكىمىنىڭ ورىنباسارى نۇركەن سەرىك ۇلى قاتىسىپ، 300-گە جۋىق تۇرعىنمەن ەركىن فورماتتا كەزدەسۋ وتكىزدى. ناتيجەسىندە 40-قا جۋىق جەتىسايلىق، ال ماقتاارالدا 35 ازامات قونىس اۋدارۋعا نيەت ءبىلدىردى.
2015 جىلدان بەرى «قۋاتتى وڭىرلەر – ەل دامۋىنىڭ درايۆەرى» جوباسى اياسىندا تۇركىستان وبلىسىنان كوپتەگەن وتباسى ءوز ەركىمەن سولتۇستىككە قونىستانىپ، جاڭا ومىرگە قادام باسۋدا. ماقتاارال اۋدانىنان 144 وتباسى 2018-2024 جىلدارى ارالىعىندا جاڭا وڭىرگە اتتانعان.
قونىس اۋدارۋ – تۋعان توپىراقتان ءۇزىلۋ ەمەس، ءومىردىڭ جاڭا بەلەسىنە بەت بۇرۋ. بۇل – ەل ىشىندەگى ەڭبەك تەڭدىگىن قامتاماسىز ەتەتىن، بولاشاعى بار باعدارلاما.
