جيىندى «AMANAT» پارتياسى تۇركىستان وبلىستىق فيليالى اتقارۋشى حاتشىسىنىڭ ورىنباسارى، قوعامدىق كەڭەس ءتوراعاسى قالىيما جانتورەيەۆا اشىپ، جۇرگىزىپ وتىردى.
كۇن تارتىبىندە كەڭەس مۇشەلەرىنىڭ جاڭا قۇرامىن تانىستىرۋ، 2022 جىلعا ارنالعان جۇمىس جوسپارىن بەكىتۋ، مەملەكەت باسشىسى، پارتيا ءتوراعاسى ق.ك.توقايەۆتىڭ ماقالاسى، سۇقباتى مەن حالىققا جولداۋىن تالقىلاۋ ماسەلەلەرى قارالىپ، سايلاۋالدى باعدارلاماداعى ينديكاتورلاردىڭ ورىندالۋى باياندالدى.
بۇعان دەيىن اتالعان كەڭەستىڭ ءتوراعاسى بولعان جازۋشى مارحابات بايعۇت كەڭەس جۇمىسىندا ءبىرقاتار ناتيجەلى جۇمىستاردى اتقاردى.
ەندى قوعامدىق كەڭەستىڭ جاڭا ءتوراعاسى بولىپ ق.جانتورەيەۆا سايلاندى. ول كەڭەس مۇشەلەرىن ماسەلەلەردى اشىق تالقىلاۋعا، ايتىلعان ۇسىنىستاردى ءتيىستى دەڭگەيدە قاراۋعا جانە قوعام مۇددەسى جولىندا قىزمەت ەتۋگە شاقىردى. ماجىلىستە قوعامدىق كەڭەستىڭ جاڭا قۇرامى تانىستىرىلىپ، تۋريزم، مادەنيەت، ءبىلىم جانە ب ا ق سالاسىنىڭ بەلسەندى وكىلدەرىمەن تولىقتى.
كۇن تارتىبىندەگى ماسەلەلەردىڭ ءبىرى ەل پرەزيدەنتى ق.ك.توقايەۆتىڭ «تاۋەلسىزدىك بارىنەن قىمبات» ماقالاسىندا ايتىلعان تۇجىرىمداماعا بايلانىستى مىندەتتەردى ورىنداۋ تۋرالى ق.ا.ياساۋي اتىنداعى ءحقتۋ-نىڭ پروفەسسورى، كەڭەس مۇشەسى بەكجىگىت سەردالى حابارلاما جاساپ، پىكىرىن ءبىلدىردى.
– ماقالانىڭ جارىق كورگەنىنە ءبىر جىلداي ۋاقىت وتكەنىمەن، ونداعى ماسەلەلەر ءالى كۇنگە دەيىن كۇن تارتىبىندە تۇر. پرەزيدەنت ەلدىڭ پىكىرىمەن ساناسىپ، پروبلەمالاردان حاباردار ەكەنىن بىلدىرگەن كۇيدە جازعان. ماقالادا ايتىلعان ماسەلەلەر مەن قاڭتار وقيعاسىنان كەيىن «جاڭا قازاقستان» يدەياسى پايدا بولدى. ماقالانىڭ «باعدار مەن بەلەس» بولىمىندە ەلدىڭ يندۋستريالىق، يننوۆاسيالىق دامۋ جولىنا كوڭىل ءبولۋدى ايتىپ، الەۋمەتتىك جاعدايدى قوزعادى، – دەدى كەڭەس مۇشەسى.
ماجىلىستە مەملەكەت باسشىسىنىڭ سۇقباتى مەن حالىققا ارناعان جولداۋى، پارتيانىڭ كەزەكتەن تىس ءححى سەزىندەگى شەشىمدەرگە بايلانىستى سۇبەلى ويلار مەن ۇسىنىستار ايتىلدى.
كۇن تارىتىبىندەگى سوڭعى ماسەلەگە بايلانىستى تۇركىستان وبلىستىق مادەنيەت باسقارما باسشىسىنىڭ ورىنباسارى ا.تەمىرحاننىڭ بايانداماسى تىڭدالدى. پارتيانىڭ وبلىس بويىنشا سايلاۋالدى باعدارلاماسىنىڭ مادەنيەت سالاسىنا قاتىستى بولىمىندە 2021 جىلى 75 ينديكاتور ورىندالعان. ءىس-شارالار مەملەكەتتىك ءتىلدىڭ تانىمالدىعى مەن قولدانىلۋ اياسىن كەڭەيتۋ ماقساتىندا وتكىزىلگەن. سونداي-اق، مادەني نىسانداردىڭ قۇرىلىسىن اياقتاۋ، تاريحي ورىنداردى قالپىنا كەلتىرۋ شارالارى دا ناتيجەلى ىسكە استى.
ال، قاسيەتتى جانە ماڭىزدى ورىندار بويىنشا ولكەتانۋ ەكسپەديسيالارى اياسىندا بىلتىر 10 ەكسپەديسيالىق ساپار جاسالىپ، 85 نىساندا عىلىمي زەرتتەۋلەر مەن ارحەولوگيالىق جۇمىستار جۇرگىزىلگەن. 2022 جىلى دا اتالعان شارالار جالعاسىن تاپپاق.
قوعامدىق كەڭەس ءتوراعاسى ق.جانتورەيەۆا كەڭەس جۇمىسىن جانداندىرۋعا قاتىستى ۇسىنىستاردىڭ قابىلدانعانىن ايتىپ، كەڭەس وتىرىسىن قورىتىندىلادى.
