– ءبىز – كۇللى تۇركى الەمىنىڭ مادەني-رۋحاني ورداسىنا اينالعان قاسيەتتى مەكەنىمىز – تۇركىستان شاھارىن تاريحي قۇندىلىقتارىنا قيانات جاساماي، قاز-قالپى ساقتاي وتىرىپ كوركەيتۋىمىز قاجەت. يۋنەسكو-نىڭ كونە مۇرالار تىزىمىنە ەنگەلى وتىرعان قاسيەتتى مۇرامىزدىڭ ءاربىر الاڭى ءبىزدىڭ بايلىعىمىز. وسىنى جادىمىزدا ساقتاپ، بىرىگە كوركەيتۋىمىز قاجەت، – دەدى ايماق باسشىسى ءومىرزاق شوكەيەۆ.
ءجۇز جەتپىس ءبىر مىڭ تۇرعىنى بار قايتا جاڭعىرعان تۇركىستان شاھارى وبلىس ورتالىعىنا اينالعالى ۇلكەن جەتىستىكتەرگە قول جەتكىزىلدى. وبلىس ورتالىعىندا 26 اكىمشىلىك-ىسكەرلىك جانە مادەني ورتالىق نىساندارى بوي كوتەردى. حالىقتى باسپانامەن تۇراقتى قامتۋ ماقساتىندا بيىل قوسىمشا 50-گە جۋىق تۇرعىن ءۇيدىڭ قۇرىلىسى جۇرگىزىلىپ جاتىر. الداعى 2-3 جىلدا جولداردى اسفالتتاۋ جانە جارىقتاندىرۋ ماسەلەسىن تولىعىمەن قامتۋ جوسپارلانعان.
دەمالىس ايماقتارىن كوبەيتۋ ماقساتىندا ورتالىق كوشە بويلارىنان 10 شاقتى اللەيالار سالىنعان جانە ساياباقتار كۇردەلى جوندەۋدەن وتكىزىلگەن. قالانى كوگالداندىرۋ جۇمىستارى بيىل دا جالعاسىن تاپپاق. قالا ماڭىنان جالپى اۋماعى 7،5 مىڭ گەكتاردى قۇرايتىن «جاسىل بەلدەۋ» قۇرۋ جوباسى تىڭعىلىقتى ىسكە اسىپ كەلەدى. ۇزىندىعى 145 شاقىرىمدى قۇرايتىن بەتون كانال سالۋ جۇمىستارى جۇرگىزىلۋدە. وسىلايشا قالانى كوگالداندىرا وتىرىپ، كليمات جاعدايىن جاقسارتۋ كوزدەلگەن.
اتاپ ءوتۋ كەرەك، شاھار باسشىسى ەسەپ بەرۋىندە ونلاين بايلانىس ارقىلى جەرگىلىكتى تەلەارنانىڭ تىكەلەي ەفيرى مەن الەۋمەتتىك جەلىلەر ارقىلى حالىقپەن تىكەلەي بايلانىستا بولىپ، ساۋالدارىنا دا جاۋاپ بەردى.
تۇركىستان وبلىسى اكىمىنىڭ باسپا ءسوز قىزمەتى
